|
|
 |
Arbaca, 21.08.2002 - 17:51 Wakhtiga London
|
Massago-Waay oo xasilloon
|
Hassan Barise - BBC Muqdisho
Sababta uu dagaalkan isu taagay maanta ayaanan si rasmi ah loo sheegin, hase yeeshee dagaallada deegaanka Masaggo-Waay ka socday ilaa Khamiistii inaga tagtay ayaa maalinna qarxayey maalinta ku xigtana iskiis isu taagayey, iyadoo ay duqey badan oo nabaddoonno ahna intaas ku dadaalayeen xakamaynta colaadda sokeeye.
Maanta haddaba, warar madax bannaan ayaa sheegaya in ay halkaasi gaareen duqey dhaqameedyada ugu waaweyn beeshaasi oo ay ka mid yihiin Imaam Maxamuud Imaam Cumar, Xasan Ugaas Cabdulle, Macallin Haaruun, Macallin Fanax iyo duqey kale kuwaasoo ay wararku sheegayaan in ay ku guuleysteen joojinta xabbaddii, iyagoo isla markaana weli hadda ku guda jira wada hadallo xoog leh oo colaaddaasi lagu daminayo.
Labada dhinac ee halkaasi ku dagaashay ayaa la xaqiijiyey in aanay isku haysan deegaan, daaqsin ama siyaasad, balse uu dagaalka oo dhanba ku saleysan yahay dhallinyaro ay sheeko ka xumaatay oo dabeedna nin la dilay kala aargoosasho ka dhalatay ay faraha ka baxday ilaa dagaal saf-ka-saf ah oo faraha looga gubto la isla galay.
Ilaa iyo hadda inta ogsoon yahay waxaa dagaalkaasi ku dhimatay 38 ruux oo maleeshiyooyinkii dagaallamaysay u badan iyadoo kontomeeyo kale ka badanna ay ku dhaawacmeen.
Sidoo kale, waxa ay khasaare ba'an soo gaartay tuulada Masaggo-Waay, taasoo ay gebi ahaanba dadkii shacabkii ahaa ka barakaceen.
|
|
| NAGALA
SOO XIRIIR |
|
| Email:
somali@bbc.co.uk |
|
Qoraalka
Noo soo Dir:
BBC
Somali Service, 116 CB Bush House, PO Box 76, Strand, London, WC2B
4PH |
Tel:
+
44 020 7557 1631
Fax:+
44 020 7497 1374 |
|
