චීනයේ භූමි කම්පාව ජීවිත රැසක් බිළිගනී

  • 4 අගෝස්තු 2014

පසුගිය ඉරිදා චීනයේ යුන්නාන් පළාතේ ඇතිවූ දරුණු භූමි කම්පාවෙන් මියගිය ගණන තුන්සිය අසුවක් දක්වා ඉහළ ගොස් ඇති බව වාර්තා වේ.

මේ වන විට ගලවා ගැනීමේ කණ්ඩායම් භූමි කම්පාව සිදු වූ ස්ථානයට ලඟා වීමට උත්සාහ දරමින් සිටියි.

හදිසි ආපදා කණ්ඩායම් විනාශයට පත් වූ මාර්ග පිළිසකර කිරීමේ යෙදී සිටින අතර දිගින් දිගටම ඇද හැළෙන වර්ෂාව සහ නායයෑම් හේතුවෙන් අනතුරට ලක් වූ ප්‍රදේශයට ලඟා වීමට නොහැකිව තිබේ.

බලධාරීන් පැමිණ ගලවා ගන්නා තුරු දහස් ගණනක ජනතාව සුන්බුන් අතර සිරවී සිටියි.

චීන බලධාරීන් විසින් අනතුරින් විපතට පත් වූවන් ගලවා ගැනීමට සහ ඔවුන්ට අත්‍යවශ්‍ය ද්‍රව්‍ය ලබා දීමට වැසියන්ගේ සහය ඉල්ලා ඇත.

බීබීසී වාර්තා කරු පවසන්නේ ඇති වූ ව්‍යසනයෙන් චීන රජය මහත් කම්පාවට පත්වී ඇති බවයි.

දහස් ගණනක් තාවකාලික කූඩාරම් සහ ඇඳන් අනතුර සිදු වූ ප්‍රදේශයට යවා ඇති බවයි පැවසෙන්නේ.