ඔබේ දුරකථනයේ හෝ පරිගණකයේ මෙය වාදනය කිරීමට අදාළ මෘදුකාංග නැත

ගාසා තීරය බිඳ වැටෙන්න ආසන්නයි - එක්සත් ජාතීන්

3 අගෝස්තු 2014 අවසාන වරට යාවත්කාලීන කළේ 18:00 GMT

ගසා තීරය බිඳ වැටීම ආසන්නයට පැමිණ ඇති අතර බරපතළ ඛේදවාචකයක් නිර්මාණය වෙමින් පවතින බව එක්සත් ජාතීන්ගේ ප්‍රකාශක ක්‍රිස් ගනෙස් පවසයි.

ගාසා තීරයේ ඇති රෝහල් සංඛ්‍යාවෙන් තුනෙන් එකක් සහ ප්‍රාථමික සෞඛ්‍ය සේවා සායන දාහතරක් ඇතුළු පලස්තීන රතු චන්ද්‍රවන්කයට සහ සෞඛ්‍ය අමාත්‍යාංශයට අයත් ගිලන් රථ විසි නවයක් හානියට පත් වී තිබෙන බව එක්සත් ජාතීන්ගේ ප්‍රකාශකවරයා වැඩි දුරටත් පැවසුවේය.

‘සෞඛ්‍ය සේවයේ කාර්ය මණ්ඩලයෙන් සියයට හතළිහක් පමණ තමන්ගේ වැඩ පොලට යාමට අසීරුවයි සිටින්නේ. අත්‍යවශ්‍ය ඖෂධ සැපයීම වගේම අනෙකුත් සේවා කඩා වැටිලා. කැඩුණ බිඳුණු සහ විනාශ වී ගිය විදුලි සැපයුම රඳා පවතින්නේ විශ්වාසයක් තැබිය නොහැකි විදුලි උත්පාදන යන්ත්‍ර මතයි’යනුවෙන් ප්‍රකාශකවරයා පවතින තත්වය විස්තර කළේය.

එක්දහස් හත්සීයක්

ගසා තීරයේ ප්‍රධාන රෝහල තුවාල කරුවන්ගෙන් පිරී ඉතිරී ගොස් ඇති අතර ආරක්ෂාව පතා පලස්තීනු වැසියන් ක්‍රීඩා පිටිවලට එක් වී සිටින බවත් මේ වන විට තුවාල කරුවන් රථ ගලේ තබා ප්‍රතිකාර ලබා දීම සිදු කරන බවත් ප්‍රකාශක ක්‍රිස් ගනෙස් පවසයි.

මේ දක්වා පලස්තීන ජාතිකයන් එක්දහස් හත්සීයක් මිය ගොස් ඇති අතර දෙලක්ෂ පනස් දහසකට වැඩි පිරිසක් එකසත් ජාතීන්ට අයත් පාසල් තුල රැකවරණය පතා ලැගුම් ගෙන සිටින බව එක්සත් ජාතීන්ගේ ප්‍රකාශක ක්‍රිස් ගනෙස් වැඩි දුරටත් කියා සිටියි.