ගැටුම් වලින් පලස්තීන ජාතිකයන් දහසක් මරුට

අවසාන යාවත්කාලීන කිරීම :  2014 ජූලි 26 සෙනසුරාදා - 10:59 GMT

ඊශ්‍රායලය සහ හමාස් ව්‍යාපාරය අතර ගැටුම් ආරම්භ වීමෙන් පසු පලස්තීන ජාතිකයන් දහසක් පමණ මියගොස් ඇතැයි ගාසා තීරයේ සෞඛ්‍ය බලධාරීහු පවසති. මිය ගිය වැඩි පිරිස සාමාන්‍ය වැසියන් බවයි ඔවුන් පවසන්නේ.

පැය දොළහක සටන් විරාමයක් ප්‍රකාශයට පත් කිරීමෙන් පසු ගාසා තීරයේ පලස්තීන වැසියෝ එදිනෙදා කටයුතු කර ගැනීම සඳහා යුහුසුළු වී සිටිති.

බැංකු සහ සමහර කඩ සාප්පු විවෘත කර ඇති අතර ඊශ්‍රායල ෂෙල් ප්‍රහාර වලින් බරපතළ ලෙස හානියට පත් ප්‍රදේශ වලට සහන සේවකයෝ ගොස් සිටින බවයි වාර්තා වන්නේ.

ඊශ්‍රායල රජය සහ හමාස් ව්‍යාපාරය ඇති කරගත් එකඟතාවක් මතයි ගාසා තීරයේ පැය දොළහක සටන් විරාමයක් ප්‍රකාශ කෙරුණේ.

මේ යුද විරාමය මානුෂික සහන සැපයීම සඳහා ලබා දුන් අවස්ථාවක් ලෙස හැඳින්වූ ඊශ්‍රායලය තම හමුදාවට පහර දීම් සිදු කළහොත් ප්‍රතිප්‍රහාර එල්ල කරන බව කියා සිටියේය.

උමං විනාශ කිරීම දිගටම

පලස්තීන සටන්කාමීන් තම රටට පහර දීම සඳහා යොදා ගන්නා උමං මාර්ග විනාශ කිරීමේ මෙහෙයුම් සටන් විරාමය අතරතුරත් ක්‍රියාත්මක කරන බව ද ඊශ්‍රායල ප්‍රකාශ කළේය.

සටන් විරාමය ආරම්භ වීමෙන් පසු මළ සිරුරු විශාල ගණනක් සොයා ගත් බවයි පලස්තීන සෞඛ්‍ය නිළධාරීන් කියා සිටියේ.

පැරිස් සාකච්ඡා

ගාසා තීරයේ ක්‍රියාත්මක වන පැය දොළහක සටන් විරාමය දීර්ඝ කරන ලෙස ඇමෙරිකා එක්සත් ජනපදය, තුර්කිය, කටාර් සහ යුරෝපයේ රටවල් ගණනාවක විදේශ ඇමතිවරු ප්‍රංශයේ පැරිස් අගනුවර දී ඉල්ලා සිටියහ.

යුද වැදී සිටින පාර්ශව දෙකම සටන් නැවත්වීමට සුදානමක් දක්වන තුරු දිගු කාලීන යුද විරාමයක් ඇති කර ගත නොහැකි බවයි පැරිස් නුවර සිටින බීබීසී වාර්තාකරු පවසන්නේ.

වැඩි තොරතුරු සඳහා

BBC © 2014 බීබීසී නොවන වෙබ් අඩවිවල අන්තර්ගතය පිළිබඳව බීබීසීය වගකීමෙන් නොබැඳේ

මෙම වෙබ් අඩවිය හොඳින්ම කියවිය හැක්කේ style sheets (CSS) ක්‍රියාත්මක කොට තිබෙන අලුත්ම වෙබ් බ්‍රවුසරයක් හරහාය. ඔබේ වත්මන් වෙබ් බ්‍රවුසරය මඟින් ඔබට මේ වෙබ් අඩවිය කියවිය හැකිමුත් එහි අඩංගු සියලු අංග පැහැදිලිව නැරඹීමට ඔබට අවස්ථාව නොලැබෙනු ඇත. ඔබේ වෙබ් බ්‍රවුසරයේ මෘදුකාංග යාවත්කාලින කිරීම හෝ ඔබට හැකිනම්  style sheets (CSS) ක්‍රියාත්මක කිරීම පිළිබඳව සලකා බලන්න.