යුක්රේනයේ විදේශිකයන්ට අනතුරක් නෑ - ලාංකිකයෙක්

5 මාර්තු 2014 අවසාන වරට යාවත්කාලීන කළේ 15:37 GMT

යුක්රේනයේ දේශපාලන අර්බුදය හේතුවෙන් ශ්‍රී ලාංකිකයන් ඇතුළු විදේශිකයන්ට කිසිදු අනතුරක් නැති බව එහි වෙසෙන ශ්‍රී ලාංකික ව්‍යාපාරිකයෙක් පවසයි.

තමන් වාසය කරන හර්කොෆ් නගරයේ ශ්‍රී ලාංකිකයන් දස දෙනකු පමණත් තවත් විදේශිකයන් සුළු පිරිසකුත් සිටින බවයි, සුසන්ත ගමගේ බීබීසී සංදේශයට කියා සිටියේ.

ක්‍රිමියානු අර්ධද්වීපයේ දැනටමත් රුසියානු හමුදා බලය තර කොට තිබේ

අර්බුදයත් සමඟම ඩොලරයේ අගය ඉහල යාම හේතුවෙන් ව්‍යාපාරික කටයුතු මඳක් අඩාල වී තිබෙන නමුත් එම තත්වය ඉතා ඉක්මනින්ම වෙනස් වනු ඇති බව ඔහුගේ අදහසයි.

මහජන උද්ඝෝෂණ හමුවේ යුක්රේනයේ පාර්ලිමේන්තුව විසින් රුසියාවට ලැදි ජනාධිපති වික්තර යනුකොවිච් බලයෙන් පහ කරනු ලැබීමත් අනතුරුව රුසියාව යුක්රේනය ආක්‍රමණය කිරීමේ සූදානමක් පිළිබඳව බිය පළ වෙමින් පවතී.

රුසියානු භාෂාව කතා කරන යුක්රේනවාසීන් බහුතරයක් වෙසෙන ක්‍රිමියානු අර්ධද්වීපයේ දැනටමත් රුසියානු හමුදා බලය තර කොට තිබෙන අතර, රුසියාවට ලැදි දේශපාලන නායකයෝ අර්ධද්වීපයේ පාලන බලයද අත් පත් කර ගත්හ.

යුක්රේන භාෂාව සහ රුසියානු භාෂාව කතා කරන ජනතාව අතර රටේ විවිධ පලාත්වල පැහැදිලි බෙදීමක් පවතින නමුත් රුසියාව යුක්රේනය ආක්‍රමණය කරනු ඇතැයි හර්කොෆ්වාසීන් විශ්වාස නොකරන බවයි, සුසන්ත ගමගේ සංදේශය කළ විමසීමකදී කියා සිටියේ.

යුක්රේනය බෙදී වෙන් වීමේ කිසිදු තර්ජනයක් මතු වී නැති බවද ඔහු සඳහන් කළේය.