දිව්‍යානිට එරෙහි චෝදනා ඉවත් කර ගන්නා මෙන් ඉල්ලීමක්

  • 19 දෙසැම්බර් 2013
දිව්‍යානි අත්අඩංගුවට ගනු ලැබීම තානාපති වරප්‍රසාද උල්ලංඝනයක් බවත් පැවසෙයි.

තම රාජ්‍යතාන්ත්‍රික නිලධාරිනියකට එරෙහිව එල්ල කොට ඇති වීසා වංචා කිරීමේ චෝදනා ඉවත් කර ගන්නා මෙන් ඉන්දියාවේ විදේශ ඇමති,සල්මන් කුර්ෂිඩ් ඇමෙරිකා එක්සත් ජනපදයෙන් ඉල්ලා සිටියි.

දිව්‍යානි කොබ්‍රගඩේ (Devyani Khobragade) නම් තම නිලධාරිනිය කිසිසේත් ම අත්අඩංගුවට ගනු නොලැබිය යුතු වූ බවයි, ඉන්දියාවේ විදේශ ඇමතිවරයා කියා සිටින්නේ.

නිව්යෝර්ක් නගරයේ ඉන්දියානු නියෝජ්‍ය කොන්සල්වරිය හැටියට කටයුතු කරමින් සිටි දිව්‍යානි කොබ්‍රගඩේ, සිය ගෘහ සේවිකාවගේ වීසා බලපත්‍රයෙහි සඳහන් කර තිබුණ ප්‍රමාණයට වඩා අඩු දීමනාවක් එම සේවිකාවට ගෙවා ඇතැයි චෝදනා කරමිනුයි අත්අඩංගුවට ගෙන තිබුණේ.

අත්අඩංගුවට ගනු ලැබුණ නියෝජ්‍ය කොන්සල්වරිය ගේ දෑතට මාංචු දමා ඇඳුම් ඉවත් කරමින් ඇය පිරික්සා ඇති අතර, එම පුවත ඉන්දියාව තුළ මහජන කෝපය ඇවිලීමට හේතු විය.

එහෙත් එක්සත් ජනපද නීතිපතිවරයාගේ කාර්යාලය, දිව්‍යානි කොබ්‍රගඩේ සිද්ධියේදී ඔවුන් කටයුතු කරන ලද ආකාරය යුක්ති සහගත කරයි.

ගෘහ සේවිකාවට සහ ඇයගේ සහකරුට සලකා ඇති වැරදි ආකාරය දෙස නොව තානාපති නිලධාරිනිය ගැන අවධානය යොමු කරන්නේ කුමක් නිසාදැයි ඇමෙරිකානු නිලධාරීහු විමසති.