ග්ලාස්ගෝ හෙලිකොප්ටර අනතුරෙන් අට දෙනෙක් මරුට

30 නොවැම්බර් 2013 අවසාන වරට යාවත්කාලීන කළේ 11:11 GMT

සිකුරාදා රාත්‍රියේ ස්කොට්ලන්තයේ ග්ලාස්ගෝ නගරයේ බීර අවන්හලක් මත පොලිස් හෙලිකොප්ටර් යානයක් කඩා වැටීමෙන් පුද්ගලයින් අට දෙනෙකු මියගොස් ඇති අතර, තවත් තිස් දෙදෙනකු රෝහල් ගත කර ඇත.

ගොඩනැගිල්ල ඇතුළත සිරවී සිටි පිරිස බේරා ගැනීමට ගිනි නිවන හමුදාව මුළු රැය පුරා කටයුතු කරමින් සිටියහ .

හෙලිකොප්ටරය කඩා වැටෙන අවස්ථාවේ එකසිය විසි දෙනකු පමණ පිරිසක් ගොඩනැගිල්ල තුළ සිටි අතර,ඔවුන්ගෙන් වැඩි දෙනෙක් ඉවතට පැන ගැනීමට සමත් වී ඇත.

සිද්ධිය ඇසින්දුටුවෙක් පැවසුවේ,ගොඩනැගිල්ලට ඉහල අහසේ පියාසර කරමින් තිබූ යානය එක් වරම කඩා වැටුණු බවයි.

හෙලිකොප්ටරය කඩා වැටීමත් සමඟ විශාල ශබ්දයක් නැගුන ද, පිපිරීමක් හෝ ගිනි ගැනීමක් සිදු වී නැති බවයි වාර්තා වන්නේ. අනතුරට හේතුව තවමත් පැහැදිළි වී නැත.