ඔබේ දුරකථනයේ හෝ පරිගණකයේ මෙය වාදනය කිරීමට අදාළ මෘදුකාංග නැත

අතුරුදහන්වූවන් වෙනුවෙන් වව්නියාවේ පෙළපාලියක්

30 අගෝස්තු 2014 අවසාන වරට යාවත්කාලීන කළේ 18:37 GMT

අතුරුදහන් වූවන් පිළිබද වූ අන්තර්ජාතික දිනය යෙදී තිබෙන අගෝස්තු තිස්වෙනිදා.

ඒ වෙනුවෙන් ශ්‍රී ලංකාවේ යුද්ධයෙන් අතුරුදහන්වූවන් සොයා දෙන ලෙස රජයට බලපෑම් කිරීමේ අරමුණින් වවුනියාවේදී පෙලපාලියක් සංවිධානය කර තිබිණ.

දෙමළ ජාතික සන්ධානය සහ අතුරුදහන්වූවන් පිළිබදව තොරතුරු සොයා බලන උතුරේත් දකුණේත් සංවිධාන කීපයක පිරිස් විසින් සංවිධානය කොට තිබූ එම පෙළපාලියට පොලිසියෙන් බාධා එල්ල වූ බවයි වවුනියාවෙන් වාර්තා වෙන්නේ.

අතුරුදන්වූවන් සොයා ගැනීම සදහා රජයට කෙරෙණ බලපෑම් තව දුරටත් වැඩි කළ යුතු බවට ස්ථිර නිගමනයකට පැමිණීමේ අවශ්‍යතාව පැහැදිලි කරමින් වවුනියාව නගර සභා ශාලාවේදී විශේෂ රැස්වීමක්ද පැවැත්විණ.

රැස්ව සිටි පිරිස අමතා කථිකයින් කීපදෙනෙකුම අදහස් දැක්වූ අතර යුද සමයේදී අතුරුදහන් වූවන් වෙණුවෙන් යම් සාධාරණයක් ඉටු විය යුතු බවත් රජය මේ සම්බන්ධයෙන් අනිවාර්යයෙන් ප්‍රකාශයක් ඉදිරිපත් කළ යුතු බවත් කථිකයන් සියලු දෙනාගේම මතය විය.

ජනාධිපතිවරයාට සන්දේශයක්

අතුරුදහන් වූවන් පිළිබඳ සොයාබැලීමට රජය විසින් පත් කරන ලද කොමිෂන් සභා සම්බන්ධයෙන් කිසිදු විශ්වාසයක් නොමැති බැවින් ජාත්‍යන්තර මට්ටමේ පරීක්ෂණයක් අවශ්‍ය බවද මෙහිදී කථිකයින් කීපදෙනෙකු විසින්ම පෙන්වා දෙනු ලැබීය.

යුද්ධයේදී තම දරුවන් හා ඥාතීන් අතුරුදහන් වූ කීපදෙනෙකුද මේ අවස්ථාවේදී සිය අත්දැකීම් විස්තර කළහ.

රැස්වීමෙන් අනතුරුව අතුරුදහන්වූවන් පිළිබදව තොරතුරු ඇතුළත් සන්දේශයක් ජනාධිපතිවරයාට යැවීම පිණිස වවුනියාව දිසාපතිවරයාට බාරදීමට හත්සීයක් පමණ දෙනා පෙලපාලියකින් ගමන් කිරීමට උත්සහ ගත් අවස්ථාවේ පොලීසියෙන් බධා එල්ලවිණි.

මේ අවස්ථාවේදී පෙලපාලිකරුවන් සහ පොලිසිය අතර උණුසුම් වචන හුවමාරුවක් සිදුවුණු නමුත් අවසානයේදී පෙලාපාලිකරුවන්ට දිසාපති කාර්යාලය දක්වා යාමට හැකියාව ලැබුණි.