අරවින්ද යළි එංගලන්ත පිටියේ

අවසාන යාවත්කාලීන කිරීම :  2014 අගෝස්තු 20 බදාදා - 13:07 GMT
  • අරවින්ද පිටියට යාමට සුදානමින්.
  • 'යළිත් අරවින්දගේ පිති හරඹයක් දැක ගැනීමට නරඹන්නන් ඉතා උනන්දුවෙන් සිටියා'
  • 'වසර තුනකට පසු පිත්තක් අතට ගත් අරවින්ද'
  • 'අරවින්දගෙන් තවමත් සමරු සටහන් ගැනීමට පොරකන අයගෙන් අඩුවක් නැහැ.’
  • අරවින්දට එරෙහිව පන්දු යැවීමට ලැබීම මට ලැබුණු ගෞරවයක් -මාටින් බැට්ලී (දකුණේ සිට දෙවැනියා)

ලෝකයේ සුපිරිතම පිතිකරුවන් අතර සිටි අරවින්ද ද සිල්වා යළිත් එංගලන්තයේ කෙන්ට් හි දර්ශනීය පිති හරඹයක යෙදුනු බව ටොන්බ්‍රිජ් ක්‍රිකට් කණ්ඩායමේ හිටපු නායක මාටින් බැට්ලී ප්‍රකාශ කරයි.

ලෝකයේ ක්‍රිකට් තරු බවට පත් වූ ක්‍රීඩකයන්ගෙන් සමන්විත ලෑෂිං ඕල් ස්ටාර්ස් කණ්ඩායම නියෝජනය කරමින් මිත්‍ර තරඟයකට සහභාගී වූ අරවින්ද ද සිල්වා ටොන්බ්‍රිජ් ක්‍රිකට් කණ්ඩායමට එරෙහිව නොදැවී ලකුණු හතළිස් අටක් ලබා ගනිමින් සිය කණ්ඩායම ජයග්‍රහණය කරා ගෙන ගිය බවයි මාටින් බැට්ලී කියා සිටියේ.

'හිටපු රජෙක්'

‘අරවින්ද කෙන්ට් ප්‍රාන්තයට ක්‍රීඩා කළ අයෙක් නිසා යළිත් ඔහුගේ පිති හරඹයක් දැක ගැනීමට නරඹන්නන් ඉතා උනන්දුවෙන් සිටියා. ඔහුට තවමත් එදා තිබුණු පිළිගැනීම ම තියෙනවා. ක්‍රිකට් ලෝකයේ හිටපු රජෙක් ලෙස සැලකෙන ඔහුට එරෙහිව පන්දු යැවීමට ලැබීම මට ලැබුණු ගෞරවයක්.’ බීබීසීයේ තිසර රතුවිතාන සමඟ සාකච්ඡාවකට එක් වෙමින් මාටින් බැට්ලී පැවසීය.

ශ්‍රී ලංකාවට ලෝක කුසලානය ගෙන ඒම සඳහා ලකුණු 42කට කඩුලු තුනක් දවා ගැනීමත් උඩ පන්දු දෙකක් ලබා ගැනීමත් නොදැවී ශතකයක් වාර්තා කරමින් තරඟයේ වීරයා වීමත් තවමත් නොබිඳුණු වාර්තාවක් ලෙස පවතී.

මෙතෙක් ශ්‍රී ලංකාවේ බිහි වුනු දක්ෂතම පිතිකරුවා අරවින්ද ද සිල්වා බව මෑතකදී කුමාර් සංගක්කාර විසින් ද බීබීසීයට ප්‍රකාශ කරන ලදී.

'විශ්වාස කළ නොහැකි'

පසුගිය වසර තුන ඇතුළත ක්‍රිකට් පිත්තක් අතට නොගත් අරවින්ද කිසිදු පුහුණුවකින් තොරව ක්‍රීඩා කළ ආකාරය විශ්වාස කළ නොහැකි බවයි ටොන්බ්‍රිජ් ක්‍රිකට් කණ්ඩායමේ හිටපු නායක පවසන්නේ.

‘කෙන්ට් ප්‍රාන්තයට ක්‍රීඩා කරන කාලේ එම කණ්ඩායමේ ප්‍රධානතම පිතිකරුවා වුනේ අරවින්ද. ඔහු පිටියට එන විට ක්‍රීඩා ලෝලීන් ඔහු වට කර ගත් අයුරු මට තාමත් මතකයි. ඔහු ක්‍රීඩාවෙන් විශ්‍රාම ගෙන ඇතත් තවමත් සමරු සටහන් ගැනීමට පොරකන අයගෙන් අඩුවක් නැහැ.’ මාටින් බැට්ලී පැවසීය.

පසුගිය දා කෙන්ට් හි පැවති මෙම මිත්‍ර තරඟයට හර්ෂල් ගිබ්ස්, ගැරෙන්ට් ජෝන්ස්, මාර්ක් ඊල්හම් ඇතුළු ලෝ පතල හිටපු ක්‍රීඩකයන් සහ තවමත් වෘත්තීය මට්ටමේ සිටින ක්‍රීඩකයන් ද සහභාගී වී තිබේ.

වැඩි තොරතුරු සඳහා

BBC © 2014 බීබීසී නොවන වෙබ් අඩවිවල අන්තර්ගතය පිළිබඳව බීබීසීය වගකීමෙන් නොබැඳේ

මෙම වෙබ් අඩවිය හොඳින්ම කියවිය හැක්කේ style sheets (CSS) ක්‍රියාත්මක කොට තිබෙන අලුත්ම වෙබ් බ්‍රවුසරයක් හරහාය. ඔබේ වත්මන් වෙබ් බ්‍රවුසරය මඟින් ඔබට මේ වෙබ් අඩවිය කියවිය හැකිමුත් එහි අඩංගු සියලු අංග පැහැදිලිව නැරඹීමට ඔබට අවස්ථාව නොලැබෙනු ඇත. ඔබේ වෙබ් බ්‍රවුසරයේ මෘදුකාංග යාවත්කාලින කිරීම හෝ ඔබට හැකිනම්  style sheets (CSS) ක්‍රියාත්මක කිරීම පිළිබඳව සලකා බලන්න.