නිර්මලාට කෝටි පනහක එන්තරවාසියක්

අවසාන යාවත්කාලීන කිරීම :  2014 අගෝස්තු 14 බ්‍රහස්පතින්දා - 11:45 GMT

ප්‍රේමකීර්ති ද අල්විස්

ශ්‍රී ලංකා ගුවන් විදුලි සංස්ථාවේ සභාපති හඩ්සන් සමරසිංහ 1989 භීෂණ සමයේ ඝාතනය කෙරුණ ප්‍රේමකීර්ති ද අල්විස්ගේ බිරිඳ වන නිර්මලා අල්විස්ගෙන් රුපියල් කෝටි පනහක වන්දියක් ඉල්ලමින් එන්තරවාසියක් යවා ඇත.

මේ අතර කට උත්තරයක් ලබා ගැනීම සඳහා ඇය පොලිසිය හමුවට කැඳවනු ලැබුණි.

එම කැඳවීම කරනු ලැබ තිබෙන්නේ, ප්‍රේමකීර්ති ද අල්විස් ඝාතනයට හඩ්සන් සමරසිංහ සම්බන්ධ කරමින් නිර්මලා විසින් සිදු කරනු ලැබ ඇති ප්‍රකාශයක් මුල් කර ගනිමිනි.

සිය නීතිවේදී ලක්ෂාන් ඩයස්ගේ උපදෙස් පරිදි දෙමටගොඩ කොළඹ පොලිස් අපරාධ කොට්ඨාශය (CCD) වෙත ගිය නිර්මලා අල්විස් පොලිසියට කට උත්තරයක් දී ඇත.

ඒ සම්බන්ධයෙන් විමසීමක් කළ විට නීතිවේදී ලක්ෂාන් ඩයස් කියා සිටියේ සිය සේවාදායිකාව පොලිස් ප්‍රශ්න කිරීම් හමුවේ පැය හතරක පමණ කාලයක කටඋත්තරයක් දුන් බවයි.

පැය හතරක කට උත්තරයක්

ප්‍රේමකීර්ති ඝාතනය සම්බන්ධයෙන් ඇය විසින් ප්‍රකාශයට පත් කරනු ලැබ ඇති කෘතියට පාදක වන තොරතුරු සනාථ කිරීමට අවශ්‍ය සාක්ෂි ඇය සතු බව නිර්මලා අල්විස් ප්‍රකාශ කළ බවයි නීතිවේදී ලක්ෂාන් ඩයස් බීබීසී සංදේශයට කියා සිටියේ.

සිය සැමියා වූ ප්‍රේමකීර්ති ද අල්විස් ඝාතනය සම්බන්ධයෙන් ශ්‍රී ලංකා ගුවන් විදුලි සංස්ථාවේ සභාපති හඩ්සන් සමරසිංහට චෝදනා කරන නිර්මලා අල්විස් ඒ ගැන පසුගිය දා ජනාධිපතිවරයාට ද දැනුම් දීමක් කළාය.

නිර්මලා අල්විස් සිය සැමියාගේ මරණය සම්බන්ධයෙන් තමාට එරෙහිව අසත්‍ය චෝදනා නගමින් අපහාසාත්මක ප්‍රකාශ සිදු කරන බව පවසන ශ්‍රී ලංකා ගුවන් විදුලි සංස්ථාවේ සභාපතිවරයා තම කීර්ති නාමයට සිදු වූ අලාභය වෙනුවෙන් රුපියල් කෝටි පනහක වන්දියක් ගෙවිය යුතු බවයි ඇය වෙත යවන ලද සිය එන්තරවාසිය මගින් කියා සිටින්නේ.

ඒ සම්බන්ධයෙන් බීබීසී සංදේශය හඩ්සන් සමරසිංහ සභාපතිවරයාගෙන් විමසූ විට එවැනි පියවරක් ගත් බව ඔහු විසින් තහවුරු කරන ලදී.

වැඩි තොරතුරු සඳහා

BBC © 2014 බීබීසී නොවන වෙබ් අඩවිවල අන්තර්ගතය පිළිබඳව බීබීසීය වගකීමෙන් නොබැඳේ

මෙම වෙබ් අඩවිය හොඳින්ම කියවිය හැක්කේ style sheets (CSS) ක්‍රියාත්මක කොට තිබෙන අලුත්ම වෙබ් බ්‍රවුසරයක් හරහාය. ඔබේ වත්මන් වෙබ් බ්‍රවුසරය මඟින් ඔබට මේ වෙබ් අඩවිය කියවිය හැකිමුත් එහි අඩංගු සියලු අංග පැහැදිලිව නැරඹීමට ඔබට අවස්ථාව නොලැබෙනු ඇත. ඔබේ වෙබ් බ්‍රවුසරයේ මෘදුකාංග යාවත්කාලින කිරීම හෝ ඔබට හැකිනම්  style sheets (CSS) ක්‍රියාත්මක කිරීම පිළිබඳව සලකා බලන්න.