ඔබේ දුරකථනයේ හෝ පරිගණකයේ මෙය වාදනය කිරීමට අදාළ මෘදුකාංග නැත

ජනපති නොපැමිණියේ 'උද්ඝෝෂණ නිසා'

23 ජූලි 2014 අවසාන වරට යාවත්කාලීන කළේ 20:51 GMT

ජනාධිපති මහින්ද රාජපක්ෂ පොදුරාජ්‍ය මණ්ඩලීය ක්‍රීඩා උළෙලට නොපැමිණියේ තමන් සංවිධානය කළ උද්ඝෝෂණ හේතුවෙන් බව දෙමළ උද්ඝෝෂකයෝ පවසති.

පොදුරාජ්‍ය මණ්ඩලයේ වත්මන් සභාපතිවරයා වන ජනාධිපතිවරයා ග්ලාස්ගෝ නුවර පැවැත්වෙන උළෙලට සහභාගි නොවන බව ජනාධිපතිවරයාගේ ප්‍රකාශක මොහාන් සමරනායක තහවුරු කළේය.

ජනාධිපතිවරයා සහභාගි නොවූවත්, සිය උද්ඝෝෂණ නොනවත්වන බව පැවසූ උද්ඝෝෂකයෝ සමාරම්භක උළෙලට සමගාමීව ග්ලාස්ගෝ නුවර උද්ඝෝෂණයක නිරතව සිටියහ.

පන්සියයක පමණ පිරිසක් එයට සහභාගිව සිටි බවයි, උළෙල වාර්තා කිරීම පිණිස ග්ලාස්ගෝ නුවරට ගොස් සිටින ජයප්‍රගාෂ් නල්ලුසාමි කළ විමසීමකදී පොලිසිය කියා සිටියේ.

ජනාධිපතිවරයා නොපැමිණියත් මෙය සිය වේදනාව සහ දුක් ගැනවිල්ල ජාත්‍යන්තර ප්‍රජාව හමුවේ කියා සිටීමට ලැබෙන හොඳම අවස්තාවක් බව උද්ඝෝෂණය සංවිධානය කළ දෙමළ සම්බන්ධීකරණ කමිටුවේ සම්බන්ධීකාරක කන්දයියා රාජමනෝහරන් සංදේශයට පැවසීය.

ජනාධිපතිවරයා නොපැමිණීමට හේතුව සිය උද්ඝෝෂණය බවද ඔහු අවධාරණය කළේය.

එහෙත් එය ප්‍රතික්ෂේප කරන ක්‍රීඩා අමාත්‍ය මහින්දානන්ද අලුත්ගමගේ සංදේශයට කියා සිටියේ, ජනාධිපති මහින්ද රාජපක්ෂ උළෙලට සහභාගි නොවීමට එකම හේතුව ළඟ එන ඌව පළාත් සභා මැතිවරණය හේතුවෙන් කාර්ය බහුල වීම නිසා බවයි.