පොලිසියට කැඳවීම ප්‍රමාණවත් නෑ - නීතිඥ සංගමය

අවසාන යාවත්කාලීන කිරීම :  2014 ජූලි 4 සිකුරාදා - 17:52 GMT

ශ්‍රව්‍ය දෘශ්‍ය වාදනය

කිසිවෙකුගේ ප්‍රකාශයක් ජාතීන් අතර අසමගියට තුඩු දුන්නේදැයි තීන්දු කිරීමේ බලය පවතින්නේ පොලිසියට නොව නීතිපතිවරයාට බව ශ්‍රී ලංකා නීතිඥ සංගමය අවධාරණය කරයි.

සවන් දෙන්න​mp3

මෙය වාදනය කිරීම සඳහා අලුත්ම Flash Player බාගතකලයුතු අතර Java Script අනිවාර්යයෙන්ම ක්‍රියාත්මක කළයුතුය

Windows player යොදාගෙන වාදනය කරන්න

පොලිසියට කැඳවීම ප්‍රමාණවත් නෑ - නීතිඥ සංගමය

00:05:57

ජාතිවාදය සහ ආගම්වාදය උසි ගන්වමින් අලුත්ගම ගැටුම්වලට අනුබල දුන් බවට චෝදනා ලබා සිටින පුද්ගලයන් පොලිසියට කැඳවා ප්‍රකාශයක් සටහන් කර ගැනීම සහ එවැනි වැරදිවලට එරෙහිව නීතිමය ක්‍රියාමාර්ග ගැනීම අතර ප්‍රබල වෙනසක් පවතින බව ශ්‍රී ලංකා නීතිඥ සංගමය පවසයි.

ශ්‍රී ලංකා නීතිඥ සංගමයේ සභාපති නීතිඥ උපුල් ජයසූරීය ඒ බව කියා සිටියේ, බොදු බල සේනා සංවිධානයේ ලේකම් ගලගොඩඅත්තේ ඥානසාර හිමියන්ගෙන් පසුගියදා පොලිසිය ප්‍රශ්න කරනු ලැබීම පොලිස් පරීක්ෂණ නිසි පරිදි පැවැත්වෙන බවට ඉඟි කෙරෙන්නක් නොවේදැයි සංදේශය කළ විමසීමකට පිළිතුරු දෙමින්.

'රස පරීක්ෂකවරයා කැඳවා පරීක්ෂණ පැවැත්වීමට පොලිසිය කටයුතු කොට නැහැ'

"ප්‍රශ්න කිරීමයි, ක්‍රියාමාර්ගයක් ගැනීමයි සම්පූර්ණයෙන්ම දෙකක්. මාධ්‍යයේ තියෙනව ඔය කරපු ප්‍රකාශයන් මොනවාද කියන එක," යනුවෙන් ඔහු සඳහන් කළේය.

පොලිස් පරීක්ෂණ සම්බන්ධයෙන් කිසිසේත්ම සෑහීමකට පත් විය නොහැකි බවයි, සභාපතිවරයා සංදේශයට කියා සිටියේ. ගැටුම් සම්බන්ධයෙන් පොලිසිය නිසි පියවර නොගන්නේ නම් පොලිසියට සහ ගැටුම්වලට සම්බන්ධ පුද්ගලයන්ට එරෙහිව පියවර ගැනීමේ බලය නීතිපතිවරයා සතුව පවතින බව නීතිඥ උපුල් ජයසූරිය අවධාරණය කළේය.

'බලය තියෙන්නේ නීතිපතිට'

"ඒ කරයි කියන ප්‍රකාශ තුල ජාතීන් අතර අසමගිතාවයක් නැත්නම් ආගම් අතර අසමගිතාවයක් ඇතිවෙලා තියනවද නැද්ද කියන එක තීරණය කළ යුත්තේ නීතිපතිවරයා. පොලිසියේ මහත්තුරු නෙවෙයි. ඒ පිළිබඳව පොලිසියට නියෝග දීමේ බලය නීතිපතිවරයාට හිමි වෙලා තියෙනව. අපි බලාපොරොත්තු වෙනවා අද හෝ හෙට, ඔහු ඒ තීරණය ගනීවි කියල," යනුවෙන්ද ඔහු පැවසීය.

මුස්ලිම් ව්‍යාපාරික ස්ථාන සහ නිවාස ගිනි තබද්දී පොලිස් විශේෂ කාර්ය බලකායේ 150 කට ආසන්න පිරිසක් ඒ සමීපයේම සිටියත් එය වැළැක්වීමට කටයුතු නොකළ බව නීතිඥ සංගම් නියෝජිත පිරිසේ නිරීක්ෂණයයි.

ගැටුම් හටගත් ප්‍රදේශවලට රස පරීක්ෂකවරයා කැඳවා පරීක්ෂණ පැවැත්වීමට පොලිසිය කටයුතු කොට නැති බව ඉරිදා සිය නිරීක්ෂණ චාරිකාවේදී අනාවරණය වූ බව සඳහන් කළ නීතිවේදී උපුල් ජයසූරීය, බ්‍රහස්පතින්දා තමන් අධිකරණයෙන් කළ ඉල්ලීම සලකා බැලූ අධිකරණය, රස පරීක්ෂකවරයා කැඳවන මෙන් පොලිසියට නියෝග කළ බව කියා සිටියේය.

ගැටුමේදී මිය ගිය එක් පුද්ගලයෙකුගේ මරණ පරීක්ෂණ වාර්තාව සම්බන්ධයෙන් ඥාතීන් සැක පහල කිරීමෙන් අනතුරුව එම මළසිරුර යලි ගොඩ ගැනීම හැකියාවක් පවතින බවත් ඔහු සංදේශයට කියා සිටියේය.

BBC © 2014 බීබීසී නොවන වෙබ් අඩවිවල අන්තර්ගතය පිළිබඳව බීබීසීය වගකීමෙන් නොබැඳේ

මෙම වෙබ් අඩවිය හොඳින්ම කියවිය හැක්කේ style sheets (CSS) ක්‍රියාත්මක කොට තිබෙන අලුත්ම වෙබ් බ්‍රවුසරයක් හරහාය. ඔබේ වත්මන් වෙබ් බ්‍රවුසරය මඟින් ඔබට මේ වෙබ් අඩවිය කියවිය හැකිමුත් එහි අඩංගු සියලු අංග පැහැදිලිව නැරඹීමට ඔබට අවස්ථාව නොලැබෙනු ඇත. ඔබේ වෙබ් බ්‍රවුසරයේ මෘදුකාංග යාවත්කාලින කිරීම හෝ ඔබට හැකිනම්  style sheets (CSS) ක්‍රියාත්මක කිරීම පිළිබඳව සලකා බලන්න.