මුස්ලිම් වෙළෙඳ සැලක් ගිනිබත් කෙරෙයි

අවසාන යාවත්කාලීන කිරීම :  2014 මැයි 9 සිකුරාදා - 19:22 GMT

ශ්‍රව්‍ය දෘශ්‍ය වාදනය

වෙළෙඳ සැලේ හිමිකරු වන මොහමඩ් නයීම් කාන් බීබීසීයට ප්‍රකාශයක් කරමින් කියා සිටියේ එම ක්‍රියාව තමාට එරෙහි කුමන්ත්‍රණයක් වන බවයි.

නරඹන්න​mp4

මෙය වාදනය කිරීම සඳහා අලුත්ම Flash Player බාගතකලයුතු අතර Java Script අනිවාර්යයෙන්ම ක්‍රියාත්මක කළයුතුය

Windows player යොදාගෙන වාදනය කරන්න

අලුත්ගම නගරයේ මුස්ලිම් ව්‍යාපාරිකයකු සතු වෙළෙඳ සැලක් ගිනිබත් කරන ලද බව වෙළඳසැල් හිමියා පවසයි.

වෙළඳසැල් හිමියාගේ සහෝදරයකු විසින් දරුවකු ලිංගික අපහරණයට ලක් කරනු ලැබ ඇති බවට චෝදනා එල්ල වෙමින් පවතින අතරවාරයේයි, ගිනි තැබීම සිදු කර තිබෙන්නේ.

මෙය තමාට එරෙහි කුමන්ත්‍රණයක් බවයි, ගිනිබත් කෙරුණ වෙළෙඳ සැලේ හිමිකරු වන මොහමඩ් නයීම් ඛාන් බීබීසී සංදේශයට ප්‍රකාශයක් කරමින් කියා සිටියේ.

සැලසුම් කළ ප්‍රහාරයක්

වෙළෙඳ සැල තුල සියලු දර්ශන ඇතුළත් වීඩියෝ පටය උසාවියට ඉදිරිපත් කරනු ලැබීමෙන් අනතුරුව ළමා අපහරණය සම්බන්ධයෙන් අත්අඩංගුවට ගෙන සිටි තම සහෝදරයා ඇප මත මුදා හරින ලද බවත් මොහමඩ් නයීම් ඛාන් සංදේශයට කියා සිටියේය.

"පන්සලේ එකතු වී මට විරුද්ධව දවස් කීපයක්ම කතා කරලා තිබුණා. මට විරුද්ධව උද්ඝෝෂණයක් කරන්නට යන බව මම පොලිසියට දැනුම් දී ආරක්ෂාව ඉල්ලුවා. සිද්ධියක් වුනොත් අවශ්‍ය පියවර ගන්නා බව පොලිසිය ප්‍රකාශ කළා," යයි ඔහු වැඩිදුරටත් කියා සිටියි.

පසුගිය අට වෙනි දින සවස පහට උද්ඝෝෂණය ආරම්භ කිරීමට යන බවට තොරතුරු ලැබුනත් එදින උදේ එය ආරම්භ කෙරුණ බවයි, මුස්ලිම් ව්‍යාපාරිකයා පවසන්නේ.

"භික්‍ෂූන් තුන් නමක් සහ තවත් දෙසිය පනහක, තුන්සීයක පමණ කණ්ඩායමක් පාර දිගේ කෑ ගසමින් ආවා. මගේ කඩේට ගිනි තබන බවටයි ඔවුන් කෑ ගැසුවේ," යනුවෙන්ද ව්‍යාපාරික මොහමඩ් නයීම් ඛාන් පවසයි.

පොලිසියේ ප්‍රතිචාරය

අලුත්ගම මුස්ලිම් වෙළෙඳ සැලට ගිනි තබනු ලැබීම සම්බන්ධයෙන් පොලිස් ප්‍රකාශක, ජ්‍යෙෂ්ට පොලිස් අධිකාරී අජිත් රෝහණගෙන් බීබීසී සංදේශය කළ විමසීමකදී ඔහු කියා සිටියේ, අපරාධය සම්බන්ධයෙන් වහාම විමර්ශනයක් සිදු කරන බවයි.

වෙළෙඳ සැලේ අයිතිකරු ඔහුට එරෙහිව උද්ඝෝෂණයක් සංවිධානය කෙරෙමින් ඇති බවට තොරතුරු අලුත්ගම පොලිසියට දැනුම් දී තිබියදීත් අවශ්‍ය ආරක්ෂාව නොසැපයීම සම්බන්ධයෙන් බීබීසිය ප්‍රශ්න කළ විට ජ්‍යෙෂ්ට පොලිස් අධිකාරීවරයා කියා සිටියේ සාමකාමී උද්ඝෝෂණ නතර කිරීමට පොලිසියට නොහැකි බවයි.

තවදුරටත් අදහස් දැක් වූ ජ්‍යෙෂ්ට පොලිස් අධිකාරී අජිත් රෝහණ ගිනි තැබීම සිදු කර ඇත්තේ විරෝධතා ව්‍යාපාරයෙන් පසු රාත්‍රී කාලයේ බවයි කියා සිටියේ.

කෙසේ වුවත් එවැනි අපරාධ කිරීමට කිසිවකුට අයිතියක් නැතැයි කියා සිටි පොලිස් ප්‍රකාශක ජ්‍යෙෂ්ට පොලිස් අධිකාරීවරයා විමර්ශන කටයුතු සිදු කරන බවත් සඳහන් කළේය.

BBC © 2014 බීබීසී නොවන වෙබ් අඩවිවල අන්තර්ගතය පිළිබඳව බීබීසීය වගකීමෙන් නොබැඳේ

මෙම වෙබ් අඩවිය හොඳින්ම කියවිය හැක්කේ style sheets (CSS) ක්‍රියාත්මක කොට තිබෙන අලුත්ම වෙබ් බ්‍රවුසරයක් හරහාය. ඔබේ වත්මන් වෙබ් බ්‍රවුසරය මඟින් ඔබට මේ වෙබ් අඩවිය කියවිය හැකිමුත් එහි අඩංගු සියලු අංග පැහැදිලිව නැරඹීමට ඔබට අවස්ථාව නොලැබෙනු ඇත. ඔබේ වෙබ් බ්‍රවුසරයේ මෘදුකාංග යාවත්කාලින කිරීම හෝ ඔබට හැකිනම්  style sheets (CSS) ක්‍රියාත්මක කිරීම පිළිබඳව සලකා බලන්න.