ජිනීවා යෝජනාව 'පහසුවෙන් සම්මත වේවි'

අවසාන යාවත්කාලීන කිරීම :  2014 මාර්තු 3 සඳුදා - 12:45 GMT

ශ්‍රව්‍ය දෘශ්‍ය වාදනය

ජිනීවා නුවරදී සඳුදා ආරම්භ වූ එක්සත් ජාතීන්ගේ මානව හිමිකම් මණ්ඩල සැසිවාරයේදී ශ්‍රී ලංකාව සම්බන්ධ යෝජනාවට පක්ෂව වැඩි ඡන්ද ලැබෙනු ඇති හැඩක් පෙනී යන බව විශ්ලේෂකයෝ පවසති.

සවන් දෙන්න​mp3

මෙය වාදනය කිරීම සඳහා අලුත්ම Flash Player බාගතකලයුතු අතර Java Script අනිවාර්යයෙන්ම ක්‍රියාත්මක කළයුතුය

Windows player යොදාගෙන වාදනය කරන්න

ජිනීවා නුවරදී සඳුදා ආරම්භ වූ එක්සත් ජාතීන්ගේ මානව හිමිකම් මණ්ඩලයේ විසි පස් වැනි සැසිවාරයේදී ශ්‍රී ලංකාව සම්බන්ධ යෝජනාවට පක්ෂව වැඩි ඡන්ද ලැබෙනු ඇති හැඩක් පෙනී යන බව දේශපාලන විශ්ලේෂකයෝ පවසති.

ඇමෙරිකා එක්සත් ජනපදයේ ප්‍රධානත්වයෙන් ඉදිරිපත් කිරීමට නියමිත යෝජනාවට පක්ෂව ඡන්ද විස්සක් හෝ වැඩි ගණනක් ලැබෙනු ඇති බවකුත්, එයට විරුද්ධව ඡන්ද පහළොවක් පමණ ලැබෙනු ඇති බවකුත් දැනට පෙනී යන බවයි, ජිනීවා නුවර සිටින මාධ්‍යවේදී සුනන්ද දේශප්‍රිය බීබීසී සංදේශයට කියා සිටියේ.

ශ්‍රී ලංකාව සම්බන්ධ යෝජනා දෙකක්ම මානව හිමිකම් මණ්ඩලයේ සම්මත විය

යෝජනාවේ අවසාන කෙටුම්පත තවමත් ප්‍රකාශයට පත් වී නැතත්, ශ්‍රී ලංකාවේ සිදු වූ බව පැවසෙන යුද අපරාධ සම්බන්ධයෙන් ජාත්‍යන්තර පරීක්ෂණයක් අවශ්‍ය බව සෘජුවම හෝ වක්‍රව එහි සඳහන් වනු ඇති බව ඔහුගේ නිගමණයයි.

සැසිවාරයේ සමාරම්භක දේශණය පැවැත් වූ මහ කොමසාරිස් නවී පිල්ලේ ශ්‍රී ලංකාව සම්බන්ධයෙන් විශේෂ සඳහනක් නොකළේ බොහෝ විට ඇය ලබන විසි හය වැනි දින ශ්‍රී ලංකාව සම්බන්ධ වාර්තාව සමුළුවට ඉදිරිපත් කිරීමට නියමිත නිසා විය හැකි බවද ඔහු කියා සිටියේය.

මහ කොමසාරිස්වරිය රටවලට අදාල වාර්තා ඉදිරිපත් කළ විට එම වාර්තා සියල්ල එක්වරම සාකච්ඡාවට ලක් කිරීම සාමාන්‍ය සම්ප්‍රදායය වුවත්, ශ්‍රී ලංකාව සම්බන්ධයෙන් සාකච්ඡා කිරීම පිණිස විශේෂයෙන් කාලය වෙන් කොට තිබීම මෙවර සැසිවාරයේ විශේෂත්වයක් බවද සුනන්ද දේශප්‍රිය සංදේශය කළ විමසීමකදී කියා සිටියේය.

දැනට ජිනීවා නුවර සිටින විදේශ අමාත්‍ය ජීඑල් පීරිස් අඟහරුවාදා නවනීදන් පිල්ලේ මහ කොමසාරිස්වරිය හමුවීමට නියමිත අතර, ඉන් අනතුරුව ඔහු බදාදා මානව හිමිකම් මණ්ඩල සැසිවාරය ඇමතීමට නියමිතව තිබේ.

BBC © 2014 බීබීසී නොවන වෙබ් අඩවිවල අන්තර්ගතය පිළිබඳව බීබීසීය වගකීමෙන් නොබැඳේ

මෙම වෙබ් අඩවිය හොඳින්ම කියවිය හැක්කේ style sheets (CSS) ක්‍රියාත්මක කොට තිබෙන අලුත්ම වෙබ් බ්‍රවුසරයක් හරහාය. ඔබේ වත්මන් වෙබ් බ්‍රවුසරය මඟින් ඔබට මේ වෙබ් අඩවිය කියවිය හැකිමුත් එහි අඩංගු සියලු අංග පැහැදිලිව නැරඹීමට ඔබට අවස්ථාව නොලැබෙනු ඇත. ඔබේ වෙබ් බ්‍රවුසරයේ මෘදුකාංග යාවත්කාලින කිරීම හෝ ඔබට හැකිනම්  style sheets (CSS) ක්‍රියාත්මක කිරීම පිළිබඳව සලකා බලන්න.