'ඩිනාර් දහයක් දෙන්නම් මාත් එක්ක හිටපන් කිවුවා'

අවසාන යාවත්කාලීන කිරීම :  2014 පෙබරවාරි 10 සඳුදා - 18:11 GMT

ශ්‍රව්‍ය දෘශ්‍ය වාදනය

ලිංගික අතවර සහ හාම්පුතුන්ගේ හිරිහැර මැද යලි සිය රට බලා ඒමට මඟ බලා සිටින ජෝර්දානයේ අම්මාන් නුවර වෙසෙන ශ්‍රී ලාංකික ගෘහ සේවිකාවන්ගේ වේදනාව.

සවන් දෙන්න​mp3

මෙය වාදනය කිරීම සඳහා අලුත්ම Flash Player බාගතකලයුතු අතර Java Script අනිවාර්යයෙන්ම ක්‍රියාත්මක කළයුතුය

Windows player යොදාගෙන වාදනය කරන්න

හාම්පුතුන්ගේ හිරිහැර හමුවේ නිවෙස්වලින් පලා ගිය තමන්ට යලි සිය රට බලා යා නොහැකිව අතරමංව සිටින බව ජෝර්දානයේ අම්මාන් අගනුවර නිවසක සැඟ වී සිටින ශ්‍රී ලාංකික ගෘහ සේවිකාවන් පිරිසක් ප්‍රකාශ කරති.

නිසි පරිදි වේතන නොගෙවීම සහ පහර දීම, ආහාර නොදීම මෙන්ම හාම්පුතාගේ අනුදැනුම යටතේ ලිංගික අතවර කිරීමට උත්සාහ කිරීම හේතුවෙන් මීට මාසයකට පමණ පෙර තමන් සේවය කළ නිවාසවලින් පලා ගිය බවයි, කාන්තාවන් සිවු දෙනකු බීබීසී සංදේශයට කියා සිටියේ.

දහස ගණන් ලාංකික කාන්තාවෝ මැදපෙරදිග ගෘහ සේවය පිණිස පිටත්ව යති

ඔවුන් සියලු දෙනාම පානදුරේ සිට ජෝර්දානයේ සේවයට පැමිණි කාන්තාවන්.

"මට එක දවසක් වයර් කෝඩ් එකකින් ගැහුවා සර්. ඔලුව නිල් පාට වෙලා ගියා ඒ ගහපු පාරට," එක් කාන්තාවක මා හා පවසන විට වේදනාව සඟවා ගැනීමට ඇය දැරූ උත්සාහය දුරකතනයේ අනෙක් අන්තයේ සිටි මට නොදැනුනා නොවේ.

බලු කූඩුව පිරිසිදු කරන පුරුෂයා නිවසට පැමිණි විට නිවසේ හිමිකාරිය සිය කාමරයට වැදී දොර වසා ගෙන ඇයට ලිංගික අතවර කිරීමට උල්පන්දම් දුන් බවයි, ඇය පවසන්නේ.

'සිය ගණනක්'

"මට ගොඩක් දස වද දුන්න සර් ඊට පස්සේ මනුස්සයෙක් දම්මල මට කරදර කෙරෙවුව. මට කියනවා ඩිනාර් දහයක් දෙන්නම් මාත් එක්ක හිටපන් කියල. උඹගේ ... එක්ක හිටපන් කියල මම බැන්න. මම ඒ මිනිහට ගැහුවා සර්," යනුවෙන් ඇය පැවසුවේ හැඬු කඳුළු අතරින්.

"මම පිහියක් අතේ තියා ගෙන හිටියේ ඊළඟ සැරේ මට කරදරයක් කළොත් මම බෙල්ලම කපනවා කියල."

"මට එක දවසක් වයර් කෝඩ් එකකින් ගැහුවා සර්. ඔලුව නිල් පාට වෙලා ගියා ඒ ගහපු පාරට"

අම්මාන් නුවර කොටු වී සිටින පානදුරවාසී කාන්තාවක්

මෙසේ සැඟ වී සිටින අතරවාරයේ කිසියම් ලෙසකින් පොලිසියට කොටු වූයේ නම් තමන් යලි රැකියා ඒජන්සියට භාර දෙන බව පවසන එම කාන්තාවෝ, නීති විරෝධීව රටේ රැඳී සිටීම නිසා වෙනත් රැකියාවක් කිරීමේ හැකියාවක් නොමැති බවද පවසති.

එසේ සිය නිවාසවලින් පලා යන ශ්‍රී ලාංකික කාන්තාවන් සිය ගණනක් ජෝර්දානයේ අතරමංව සිටින බවයි, ඔවුන් පවසන්නේ.

එවැනි අතවර හමුවේ අම්මාන් නුවර තානාපති කාර්යාලයට ගිය විට එහි නිලධාරීන් තමන් යලි ඒජන්සියට භාර දෙන බව ඔවුන්ගේ චෝදනාවයි. ඉන් අනතුරුව රැකියා ඒජන්සිය බොහෝ විට තමන් යලි පැරණි හාම්පුතාටම භාර දෙන බැවින් තමන්ට සිදු වන්නේ කබලෙන් ලිපට වැටීමට බව ඔවුහු පවසති.

'බොරු චෝදනා'

එහෙත් එම චෝදනාව සත්‍යයෙන් තොර බව තානාපති කාර්යාලයේ කම්කරු කටයුතු භාර නිලධාරී යාපා පතිරණ බීබීසී සංදේශයට කියා සිටියේය.

ශ්‍රී ලංකාවේ සිට පැමිණෙන අවස්ථාවේදීම හාම්පුතා මෙහෙකාරියට කිසියම් මුදලක් ගෙවන බව පවසන ඔහු, රැකියා ඒජන්සිවලට ගෙවන මුදලද ඇතුළුව රුපියල් ලක්ෂ පහකට ආසන්න මුදලක් අදාළ හාම්පුතා විසින් වියදම් කොට තිබෙන බව පවසයි.

එබැවින් මෙහෙකාරියක නිවසින් පලා ගිය විට තමන් ගෙවූ මුදල ආපසු හාම්පුතාට ලබා දෙන තුරු ඇයට රටින් පිට වීමේ වීසා බලපත්‍රයක් නොලැබෙන බවයි, තානාපති කාර්යාලයේ දෙවැනි ලේකම් යාපා පතිරණ සංදේශයට කියා සිටියේ.

රටේ පවත්නා නීතියට පරිබාහිරව කටයුතු කිරීමට තමන්ට හැකියාවක් නොමැති නමුත්, ලිංගික අතවරයක් පිළිබඳ චෝදනාවක් එල්ල වූ විට තානාපති කාර්යාලය වහාම ඒ සම්බන්ධයෙන් අදාළ පියවර ගන්නා බවද ඔහු අවධාරණය කළේය.

BBC © 2014 බීබීසී නොවන වෙබ් අඩවිවල අන්තර්ගතය පිළිබඳව බීබීසීය වගකීමෙන් නොබැඳේ

මෙම වෙබ් අඩවිය හොඳින්ම කියවිය හැක්කේ style sheets (CSS) ක්‍රියාත්මක කොට තිබෙන අලුත්ම වෙබ් බ්‍රවුසරයක් හරහාය. ඔබේ වත්මන් වෙබ් බ්‍රවුසරය මඟින් ඔබට මේ වෙබ් අඩවිය කියවිය හැකිමුත් එහි අඩංගු සියලු අංග පැහැදිලිව නැරඹීමට ඔබට අවස්ථාව නොලැබෙනු ඇත. ඔබේ වෙබ් බ්‍රවුසරයේ මෘදුකාංග යාවත්කාලින කිරීම හෝ ඔබට හැකිනම්  style sheets (CSS) ක්‍රියාත්මක කිරීම පිළිබඳව සලකා බලන්න.