නවී පිල්ලේ හමුවූ දෙමළ වැසියන්ට 'හමුදාවෙන් තර්ජන'

අවසාන යාවත්කාලීන කිරීම :  2013 අගෝස්තු 30 සිකුරාදා - 09:31 GMT
Navi Pillai meeting people in the north

උතුරේදී නවී පිල්ලේ හමුවූ දෙමළ වැසියන්ට තර්ජන එල්ල වී ඇතැයි දෙජාස පවසයි

මානව හිමිකම් පිලිබඳ එක්සත් ජාතීන්ගේ මහ කොමසාරිස්වරිය උතුරේ සංචාරය කළ අවස්ථාවේ ඇය හමුවූ පුද්ගලයන්ට ශ්‍රී ලංකා යුද හමුදාවෙන් තර්ජන එල්ල වී ඇතැයි දෙමළ ජාතික සන්ධානය පවසයි.

දෙමළ ජාතික සන්ධානය කොළඹදී නවී පිල්ලේ හමුවූ අවස්ථාවේ මේ පිළිබඳව ඇයට දැනුම් දුන් බව සන්ධානයේ උතුරු පළාත් සභා මහ ඇමති අපේක්ෂක සීවී විග්නේශ්වරන් බීබීසී සංදේශයට කියා සිටියේය.

"ඒක නම් හරි වැරදි වැඩක්. මිනිස්සු තමන්ගේ ප්‍රශ්න කියන්න යන කොට හමුදාවෙන් හරි කාගෙන් හරි ඒගොල්ලන්ට හිරිහැරයක් කරනවා නම් ඒක වැරැද්දක්," යනුවෙන්ද ඔහු කියා සිටියේය.

මේ සතිය මුලදී මහ කොමසාරිස්වරිය උතුරේ සංචාරය කළ අවස්ථාවේ, අතුරුදහන්වූවන්ගේ ඥාතීන් ඇතුළු සාමාන්‍ය වැසියන් පිරිසක් ඇය හමුවී සිය දුක් ගැනවිලි ඉදිරිපත් කළහ.

'බොරු චෝදනා'

Protest in Colombo against Pillai visit

කොටි සංවිධානයේ අපරාධ පිළිබඳව ද සොයා බලන මෙන් උද්ඝෝෂකයෝ නවී පිල්ලේ ගෙන් ඉල්ලා සිටියහ

සිය සන්ධානයේ නියෝජිතයන් සමඟ අද පැවති සාකච්ඡාවේදී උතුරේ පවතින වාතාවරණය පිළිබඳව නවී පිල්ලේ දැනුවත් කළ බව ද විග්නේශ්වරන් පැවසීය.

කෙසේ නමුත් මහ කොමසාරිස්වරිය හමුවූ පුද්ගලයන්ට තර්ජනය කළ බවට එල්ල වන චෝදනා ප්‍රතික්ෂේප කරන අමාත්‍ය කෙහෙළිය රඹුක්වැල්ල එය විග්‍රහ කළේ, ශ්‍රී ලංකාව අපකීර්තියට පත් කිරීමේ උත්සාහයක් ලෙසින්.

"ටීඑන්ඒ එක ඔය වගේ දේවල් කියන එක ගැන මම පුදුම වෙන්නේ නෑ. ඔය වගේ බොරු චෝදනා ඉදිරිපත් කරලා රට අපකීර්තියට පත් කරන එකනේ එයාල හැමදාම කළේ," යන්න එම චෝදනාවට ඇමතිවරයාගේ ප්‍රතිචාරයයි.

ජනාධිපති මහින්ද රාජපක්ෂ 2009 දී එක්සත් ජාතීන්ගේ මහ ලේකම් බෑන් කි මූන් සමඟ එළඹුණු එකඟතාවය කඩ කොට තිබෙන බව සිය පක්ෂයේ සය-පුද්ගල නියෝජිත පිරිස ඇයට පෙන්වා දුන් බවද සීවී විග්නේශ්වරන් සංදේශයට කියා සිටියේය.

මේ අතර ආණ්ඩුවේ ආරක්ෂක අංශවල පමණක් නොව කොටි සංවිධානයේ අපරාධ පිළිබඳව ද සොයා බලන මෙන් නවී පිල්ලේ ගෙන් ඉල්ලා සිටිමින් 'යුද්ධයෙන් මියගිය රණවිරුවන්ගේ සංවිධානය' කොළඹ දී උද්ඝෝෂණයක් සංවිධානය කොට තිබුණි.

වැඩි තොරතුරු සඳහා

BBC © 2014 බීබීසී නොවන වෙබ් අඩවිවල අන්තර්ගතය පිළිබඳව බීබීසීය වගකීමෙන් නොබැඳේ

මෙම වෙබ් අඩවිය හොඳින්ම කියවිය හැක්කේ style sheets (CSS) ක්‍රියාත්මක කොට තිබෙන අලුත්ම වෙබ් බ්‍රවුසරයක් හරහාය. ඔබේ වත්මන් වෙබ් බ්‍රවුසරය මඟින් ඔබට මේ වෙබ් අඩවිය කියවිය හැකිමුත් එහි අඩංගු සියලු අංග පැහැදිලිව නැරඹීමට ඔබට අවස්ථාව නොලැබෙනු ඇත. ඔබේ වෙබ් බ්‍රවුසරයේ මෘදුකාංග යාවත්කාලින කිරීම හෝ ඔබට හැකිනම්  style sheets (CSS) ක්‍රියාත්මක කිරීම පිළිබඳව සලකා බලන්න.