වැලිවේරියේ වෙඩි තැබීම ගැන ජනාධිපතිට සන්දේශයක්

14 අගෝස්තු 2013 අවසාන වරට යාවත්කාලීන කළේ 16:59 GMT

කොළඹ කොටුව දුම්රිය පොළ අසලට රැස්වූ උද්ඝෝෂකයන් දහස් ගණනක් නිරායුධ වැසියන්ට වෙඩි තැබීම සහ අදහස් ප්‍රකාශ කිරීමට බාධා පමුණුවාලීමට බාධා කිරීම පිළිබඳව ආණ්ඩුවට චෝදනා කරමින් විරෝධතාවක් පැවැත්වුහ.

එක්සත් ජාතික පක්ෂයේ නායකයෝ මෙන්ම සිවිල් සංවිධාන ගණනාවක නායකයින් මෙම අවස්ථාවට සහභාගිවුහ.

වීපක්ෂ නායක රනිල් වික්‍රමසිංහ කියා සිටියේ ආණ්ඩුව වෙනස් කිරීමේ වැඩ පිළිවෙලකට තමන් අවතීර්ර්ණය වන බවයි.

පාර්ලිමේන්තු මන්ත්‍රී රන්ජන් රාමනායක කියා සිටියේ දැන් ආණ්ඩුව ජනතාව බිය ගන්වා ඇති හෙයින් විරෝධය පෑමට ඉදිරිපත් වෙන පිරිසේ අඩුවක් දක්නට ලැබෙන බවයි.

වැලිවේරියේ දී තිදෙනෙකුට වෙඩි තැබීමට නියෝග දුන්නේ කව්රුන්දැයි දැනගැනීමට ජනතාවට අයිතියක් ඇති බව උද්ඝෝෂකයෝ කියා සිටියහ.

උද්ඝෝෂකයන් පෙළපාලියකින් ජනාධිපති මන්දිරය දෙසට ගමන් ගැනීමට උත්සාහ ගත් අතර පසුව එක්සත් ජාතික පක්ෂයේ යොවුන් පෙරමුණේ සාමාජිකින් කීප දෙනකුට සන්දේශයක් භාර දීම සඳහා ජනාධිපති කාර්යාලයට ඉඩ ලබා දෙන ලදී.