පොලිස් අත් අඩංගුවේදී පහරදීම ගැන පරීක්ෂණ

13 අගෝස්තු 2013 අවසාන වරට යාවත්කාලීන කළේ 17:54 GMT

අත්අඩංගුවේ දී පහර දුන් බවට අලුතින් නැගෙන චෝදනාවක් සම්බන්ධයෙන් පරීක්ෂණ අරඹා ඇතැයි පොලිසිය ප්‍රකාශ කරයි.

ලග්ගල පොලිසියේ නිලධාරීන් තමන් සහ සගයෙකුට පහර දුන් බවට චෝදනා කරන තරුණයකු මේ වන විට ප්‍රතිකාර ලබමින් සිටින්නේ දඹුල්ල රෝහලේ.

විසි පස් හැවිරිදි නිලන්ත බණ්ඩාර කියා සිටියේ නො කළ වරදකට අමානුෂික අන්දමින් පහර දී බොරු චෝදනා ගොනු කොට තමන් දෙදෙනා උසාවියට ඉදිරිපත් කළ බවයි.

වැලි ව්‍යාපාර

වැලි ප්‍රවාහක රථයක ගැටුණු මවකත් පුතකුත් මියයාම ට විරෝධය පා ලග්ගල හත්තොටඅමුණ ප්‍රදේශයේ ගොම හන්දියේ පැවති මහජන විරෝධතාව

වැලි ප්‍රවාහක ටිපර් රථයක ගැටුණු යතුරු පැදියක සිටි මවකත් පුතකුත් මියයාම ට විරෝධය පා ලග්ගල හත්තොටඅමුණ ප්‍රදේශයේ ගොම හන්දියේ පැවති මහජන විරෝධතාවකින් පසුව පොලිස් ප්‍රහාරයට ලක්වූ බවයි තරුණයන් දෙදෙනා කියා සිටින්නේ.

ප්‍රදේශයේ වැලි ගොඩ දැමීමේ ව්‍යාපාර වලට දේශපාලන බලධාරීන්ගේත්, පොලිසියේත් සහයෝගය ඇතිව පවත්වා ගෙන යන බවයි, තරුණයන්ගේ චෝදනාව.

එය ප්‍රතික්ෂේප කරන මාතලේ සහකාර පොලිස් අධිකාරී තිලින හේවාපතිරණ අප කළ විමසීමක දී කියා සිටියේ තද බල පහර දීමක් සිදු වී නැති බවයි.

තරුණයා රෝහල්ගත වී ඇත්තේ අධිකරණයෙන් ‘ඇප දී නිදහස් කිරීමෙන් පසුව’ බව කී සහකාර පොලිස් අධිකාරී වරයා ඔහුගෙන් බදාදා කට උත්තර ලබා ගැනීමට පියවර ගන්නා බවත් ප්‍රකාශ කළේය.