මුස්ලිම් පාර්ශවයකට මහ ඇමතිකම දීමට විරුද්ධ නෑ - පිල්ලෙයාන්

අවසාන යාවත්කාලීන කිරීම :  2012 සැප්තැම්බර් 9 ඉරිදා - 14:09 GMT
Pillayan (L) together with President Rajapaksa (C) and Minister Karuna

නියෝජ්‍ය අමාත්‍ය කරුණා අම්මාන් ගේ සොහොයුරිය රුදමලර් ඥානබාස්කරන්ද මන්ත්‍රී ධූරයක් දිනා ගැනීමට සමත් වී නැත

පාලක එක්සත් ජනතා නිදහස් සන්ධානය නැගෙනහිර පළාත් සභාවේ බහුතර බලය අත්පත් කර ගැනීමට අපොහොසත් වී ඇති හෙයින් මුස්ලිම් පාර්ශවයකට මහ ඇමති පදවිය පිරිනැමීම පිළිබඳව තමාගේ විරෝධයක් නැති බව හිටපු මහ ඇමතිවරයා පවසයි.

සිවනේසතුරෛ චන්ද්‍රකාන්තන් හෙවත් පිල්ලෙයාන් ඒ බව පැවසුවේ සෙනසුරාදා පැවැත්වුණු මැතිවරණයේ ප්‍රතිඵලය පිළිබඳව බීබීසී සංදේශය ඔහුගෙන් කරුණු විමසූ අවස්ථාවේ දී.

කෙසේ වෙතත් දෙමළ ජනතාව අතරමං කොට දමන ලද බවට හිටපු මහ ඇමතිවරයා දෙමළ ජාතික සන්ධානයට (ටීඑන්ඒ) චෝදනාවක්ද එල්ල කළේය.

මඩකලපුව දිස්ත්‍රික්කය සඳහා පාලක සන්ධානය වෙනුවෙන් ඉදිරිපත් වූ අපේක්ෂයන් දස දෙනාගෙන් අට දෙනෙකුම පරාජයට පත් වී තිබෙන අතර සිය මන්ත්‍රී ධූර ආරක්ෂා කර ගැනීමට සමත් වී තිබෙන්නේ පිල්ලෙයාන් සහ හිටපු පළාත් සභා අමාත්‍ය එම් එස් සුබයිර් පමණයි.

නියෝජ්‍ය අමාත්‍ය විනයාගමූර්ති මුරලිදරන් හෙවත් කරුණා අම්මාන් ගේ සොහොයුරිය රුදමලර් ඥානබාස්කරන්ද මන්ත්‍රී ධූරයක් දිනා ගැනීමට සමත් වී නැත.

කිසියම් ලෙසකින් පාලක සන්ධානයට නැගෙනහිර පළාත් සභාවේ පාලන බලය අහිමිවන්නේ නම්, දෙමළ ජනතා ප්‍රශ්න විසඳීම සඳහා තමන් ටීඑන්ඒ සන්ධානයට වසර තුනක කාලයක් ලබා දෙන බවයි, සිවනේසතුරෛ චන්ද්‍රකාන්තන් සඳහන් කළේ.

එසේ එම ගැටළු විසඳිය නොහැකි නම් තම පළාතේ දෙමළ ජනතාවට තම මතයට අවනත වීමට ඉඩ දෙන මෙන් ඔහු දෙමළ ජාතික සන්ධානයෙන් ඉල්ලීමක්ද කළේය.

වැඩි තොරතුරු සඳහා

BBC © 2014 බීබීසී නොවන වෙබ් අඩවිවල අන්තර්ගතය පිළිබඳව බීබීසීය වගකීමෙන් නොබැඳේ

මෙම වෙබ් අඩවිය හොඳින්ම කියවිය හැක්කේ style sheets (CSS) ක්‍රියාත්මක කොට තිබෙන අලුත්ම වෙබ් බ්‍රවුසරයක් හරහාය. ඔබේ වත්මන් වෙබ් බ්‍රවුසරය මඟින් ඔබට මේ වෙබ් අඩවිය කියවිය හැකිමුත් එහි අඩංගු සියලු අංග පැහැදිලිව නැරඹීමට ඔබට අවස්ථාව නොලැබෙනු ඇත. ඔබේ වෙබ් බ්‍රවුසරයේ මෘදුකාංග යාවත්කාලින කිරීම හෝ ඔබට හැකිනම්  style sheets (CSS) ක්‍රියාත්මක කිරීම පිළිබඳව සලකා බලන්න.