චීන ධීවරයන් චීන නිලධාරීන්ට භාර දුන්නා - නාවික හමුදාව

අවසාන යාවත්කාලීන කිරීම :  2012 අගෝස්තු 7 අඟහරුවාදා - 13:18 GMT
One of the vessels detained by the navy

ඔවුන් ගේ සැබෑ ඉරණම පිළිබඳව කිසියම් අවිනිශ්චිත වාතාවරණයක් උදා වී ඇති බවයි, කොළඹ සිටින බීබීසී වාර්තාකරු පවසන්නේ

ශ්‍රී ලංකා නාවික හමුදාව විසින් සඳුදා රඳවා ගන්නා ලද චීන ජාතික ධීවරයන් 37 දෙනා චීන ජාතික නිලධාරීන්ට භාර දුන් බව නාවික හමුදාව කියයි.

ඔවුන් නිදහස් කර ගැනීමේ අරමුණින් ශ්‍රී ලංකාවේ චීන තානාපති කාර්යාලයේ නිලධාරීන් නැගෙනහිර පළාතට ගොස් සිටින බව ෂින්හුවා චීන නිළ පුවත් සේවය වාර්තා කොට තිබුණි.

ධීවරයන් පිරිස චීන නිලධාරීන්ට භාර දුන් බවයි, නාවික හමුදා ප්‍රකාශක කොමදෝරු කෝසල වර්ණකුලසූරිය බීබීසී සංදේශයට කියා සිටියේ.

කෙසේ නමුත්, ඔවුන් ගමන් කළ යාත්‍රා දෙකේ අයිතිකරු, ආරුගම්බේ මැරයින් සමාගමේ කළමනාකාර අධ්‍යක්ෂ ජමාල්දීන් මොහොමඩ් සැකරියා බීබීසී සංදේශයට කියා සිටියේ ඔවුන් කොතැනක සිටින්නේ දැයි තමන් තවමත් නොදන්නා බවයි.

චීන ජාතිකයන් පිරිස අත් අඩංගුවට ගෙන ඇතැයි ෂින්හුවා චීන නිළ පුවත් සේවය වාර්තා කරන නමුත් ඔවුන් වෙනත් භාෂාවක් කතා නොකරන බැවින් ඔවුන් අත් අඩංගුවට නොගත් බවයි, පොලිස් ප්‍රකාශක පොලිස් අධිකාරී අජිත් රෝහණ බීබීසී සංදේශයට කියා සිටියේ.

මේ තත්ත්වය හමුවේ ඔවුන් ගේ සැබෑ ඉරණම පිළිබඳව කිසියම් අවිනිශ්චිත වාතාවරණයක් උදා වී ඇති බවයි, කොළඹ සිටින බීබීසී වාර්තාකරු චාර්ල්ස් හැවිලන්ඩ් පවසන්නේ.

ඉතා සුහද සම්බන්ධතා පවතින ශ්‍රී ලංකාව සහ චීනය අතර හටගත් ඉතා දුර්ලභ රාජ්‍යතාන්ත්‍රික මතභේදයක් ලෙසිනුයි, ඔහු මෙම සිදුවීම විග්‍රහ කරන්නේ.

මේ අතර චීන ජාතිකයන් පිරිස සමඟ අත් අඩංගුවට ගන්නා ලද ශ්‍රී ලාංකිකයන් දෙදෙනා ඊයේ සඳුදා මහේස්ත්‍රාත්වරයෙකු හමුවට ඉදිරිපත් කරන ලදුව ඇප මත නිදහස් කරනු ලැබ තිබේ.

වැඩි තොරතුරු සඳහා

BBC © 2014 බීබීසී නොවන වෙබ් අඩවිවල අන්තර්ගතය පිළිබඳව බීබීසීය වගකීමෙන් නොබැඳේ

මෙම වෙබ් අඩවිය හොඳින්ම කියවිය හැක්කේ style sheets (CSS) ක්‍රියාත්මක කොට තිබෙන අලුත්ම වෙබ් බ්‍රවුසරයක් හරහාය. ඔබේ වත්මන් වෙබ් බ්‍රවුසරය මඟින් ඔබට මේ වෙබ් අඩවිය කියවිය හැකිමුත් එහි අඩංගු සියලු අංග පැහැදිලිව නැරඹීමට ඔබට අවස්ථාව නොලැබෙනු ඇත. ඔබේ වෙබ් බ්‍රවුසරයේ මෘදුකාංග යාවත්කාලින කිරීම හෝ ඔබට හැකිනම්  style sheets (CSS) ක්‍රියාත්මක කිරීම පිළිබඳව සලකා බලන්න.