ශිෂ්‍ය දඩයමට 'ශිෂ්‍යයන්ම යොදාගැනීමේ සැලසුමක්'

අවසාන යාවත්කාලීන කිරීම :  2012 ජූලි 8 ඉරිදා - 12:08 GMT
University of Ruhuna

මේ වසරේද සිදුවීම් පෙළගැසීම 'අවාසනාවන්ත ගමනක ආරම්භය' වියහැකි බවට ශිෂ්‍ය නායකයෝ අනතුරු අඟවති

අධ්‍යාපන ක්ෂේත්‍රයේ මතුවී තිබෙන අවුල් සහගත තත්ත්වයට එරෙහිව හඬනගන ශිෂ්‍යයන් සහ ශිෂ්‍ය සංවිධාන මර්දනය කිරීම සඳහා අදාල විශ්ව විද්‍යාලවල ශිෂ්‍ය ශිෂ්‍යාවන්ම යොදාගැනීමේ ක්‍රියාදාමයක් දියත් වී තිබෙන බවට රුහුණු විශ්ව විද්‍යාලයේ මහා ශිෂ්‍ය සංගමය අනතුරු අඟවයි.

අධ්‍යාපන බලධාරීන් විසින් මේ සඳහාම ශිෂ්‍ය ශිෂ්‍යාවන් 500 ක් තෝරාගෙන බදුල්ලේ ඌව විශ්ව විද්‍යාලයේදී පුහුණුවක් ලබාදී තිබෙන බවද ශිෂ්‍ය සංගමය විසින් නිකුත් කරන ලද නිවේදනයක සඳහන් වේ.

ශිෂ්‍යයන් පිරිසකට විශේෂ වරදානයන් ලබාදී "ඔවුන්ගේ මැදිහත්වීමෙන් ඇතිකරන ගැටුම්වල වගකීම සාමාන්‍ය අහිංසක සිසුන් මත පැටවීම," බලධාරීන්ගේ සැලසුම බව පවසන රුහුණු විශ්ව විද්‍යාලයේ මහා ශිෂ්‍ය සංගමය, මෑතදී විශ්ව විද්‍යාල සිසුවෙක් ආචාර්යවරුන්ද බලාසිටියදී පිහියක් අතින් ගෙන ජ්‍යෙෂ්ට සිසුන්ට තර්ජනය කිරීම මෙම ක්‍රියාදාමයේ ආසන්නතම අවස්ථාව බවද සඳහන් කරයි.

පසුගිය වසරේ රුහුණ විශ්ව විද්‍යාලයේ සිසුන් 18 දෙනෙකු අත් අඩංගුවට ගැනීමෙන් ආරම්භ වූ අර්බුදය කෙළවර වූයේ සුසන්ත බණ්ඩාර ශිෂ්‍යයා ඝාතනයට පත්වීමෙන් බව පෙන්වාදෙන ශිෂ්‍ය නියෝජිතයෝ මේ වසරේද සිදුවීම් පෙළගැසෙමින් තිබෙන්නේ එවැනි වාතාවරණයක් නිර්මාණය කිරීම සඳහා විය හැකි බවට අනතුරු අඟවයි.

"තමන් කරන සියලු අපරාධයන් තමන් විසින් මාධ්‍ය තුල මවන බිල්ලකු වෙත පටවා ඒ බිල්ලා තමන්ට එරෙහි සටන් කරන බලවේග හා සමපාත කර ඒවාට එරෙහිව කරන මර්දනය සාධාරණීකරණය කරගැනීම පාලකයන්ගේ කුප්‍රකට උපාය," බවද ශිෂ්‍ය නායකයෝ පවසති.

BBC © 2014 බීබීසී නොවන වෙබ් අඩවිවල අන්තර්ගතය පිළිබඳව බීබීසීය වගකීමෙන් නොබැඳේ

මෙම වෙබ් අඩවිය හොඳින්ම කියවිය හැක්කේ style sheets (CSS) ක්‍රියාත්මක කොට තිබෙන අලුත්ම වෙබ් බ්‍රවුසරයක් හරහාය. ඔබේ වත්මන් වෙබ් බ්‍රවුසරය මඟින් ඔබට මේ වෙබ් අඩවිය කියවිය හැකිමුත් එහි අඩංගු සියලු අංග පැහැදිලිව නැරඹීමට ඔබට අවස්ථාව නොලැබෙනු ඇත. ඔබේ වෙබ් බ්‍රවුසරයේ මෘදුකාංග යාවත්කාලින කිරීම හෝ ඔබට හැකිනම්  style sheets (CSS) ක්‍රියාත්මක කිරීම පිළිබඳව සලකා බලන්න.