තායිවාන් ගෑස් අනතුරින් විශාල ජීවිත විනාශයක්

1 අගෝස්තු 2014 අවසාන වරට යාවත්කාලීන කළේ 11:10 GMT

තායිවානයේ දෙවැනි ප්‍රධාන නගරය වන ‘කාඔසියුන්ග්’ නගරයේ (Kaohsiung ) සිදු වූ බිහිසුණු ගෑස් පිපිරීම් කීපයකින් විශාල ජීවිත විනාශ යක් සිදු ව ඇති බව වාර්තා වෙයි.

අඩු තරමින් විසිහතර දෙනකුවත් මරණයට පත්ව තවත් තුන්සීයකට ආසන්න ජනකායක් තුවාල ලැබ සිටින බවයි තායිවාන් වාර්තාවන්හි දැක්වෙන්නේ.

එහි ලඟා වූ බීබීසී වාර්තාකරුවෙක් අනතුර පිළිබඳව තොරතුරු ගෙන එමින් කියා සිටියේ, එම ස්ථානය භූමි කම්පාවකට හෝ මහා කුණාටුවකට ගොදුරු වූ තත්වයකට සමාන විනාශයකට ලක් ව ඇති බවයි.

ගිනි නිවන හමුදා භටයන් සහ යුද හමුදාව මහජනයා බේරා ගැනීමේ නිරතව සිටින අතර ඔවුන් විනාශයේ මට්ටම තක්සේරු කිරීමේ ප්‍රයත්නයක යෙදී සිටින බවයි, බීබීසී වාර්තාකරු පවසන්නේ.

ගෑස් පිපිරීමත් සමඟ දොළොස් දහසක් පමණ නිවාස බලශක්තිය නොමැති තත්වයකට පත්ව ඇති බවත් අනතුර සිදු වූ කලාපයෙන් ලැබෙන වාර්තා මගින් පැවසෙයි.

අද දවස පුරාම රජයේ කාර්යාල සහ පාසල් වසා දමා තිබුණි.

තායිවාන් බලධාරීන් පවසන්නේ පිපිරීමට හේතුව තවමත් අපැහැදිලි බවයි.