අප ලබා දුන්නේ ප්‍රජා පොලිස් පුහුණුවක් - ස්කොට්ලන්ත පොලිසිය

11 සැප්තැම්බර් 2013 අවසාන වරට යාවත්කාලීන කළේ 16:55 GMT

බ්‍රිතාන්‍ය ආණ්ඩුව ශ්‍රී ලංකාවේ පොලිස් නිලධාරීන් පුහුණු කිරීම සඳහා දියත් කල වැඩසටහන ජාත්‍යන්තර ප්‍රමිතියට සහ ප්‍රජා පොලිස් නිලධාරී පුහුණු කිරීම් වලට අනුව සකස් කළ වැඩ පිළිවෙලක් බව එම වැඩසටහනේ පුහුණුකරුවෙක් වූ පොලිස් පරීක්ෂක ක්‍රෙග් ඩුවර් කියා සිටියි.

ඔහු මේ අදහස් පළ කලේ ශ්‍රී ලංකා පොලිසිය සිදු කරන මානව හිමිකම් කඩ කිරීම් සම්බන්ධයෙන් යම් වගකීමක් එය පුහුණු කිරීමේ යෙදී සිටින ස්කොට්ලන්ත පොලිසිය භාර ගත යුතු බවට එල්ල වූ චෝදනා සම්බන්ධයෙන් සංදේශය විමසූ අවස්ථාවේ.

ස්කොට්ලන්ත පොලීසිය විසින් වසර හයක් තිස්සේ ශ්‍රි ලංකාවේ පොලිස් නිලධාරීන් පුහුණු කරන බව Corporate Watch සංවිධානය නිකුත් කල වාර්තාවකින් අනාවරණය වූ අතර ශ්‍රී ලංකා පොලිසිය සිදු කරන මානව හිමිකම් කඩ කිරීම් සම්බන්ධයෙන් ඊට පුහුණු පාඨමාලා ලබාදෙන ස්කොට්ලන්ත පොලිසියේ අවධානය යොමු විය යුතු බවයි ජාත්‍යන්තර ක්ෂමා සංවිධානය කියා සිටියේ.

ස්කොට්ලන්ත රජයේ වියදමින් ශ්‍රී ලංකාවට නව ආරක පොලිස් සේවයක් ගොඩ නැංවීමේ අරමුණින් ක්‍රියාත්මක වූ පොලිස් නිලධාරීන් පුහුණු කිරීමේ වැඩසටහන මෙසේ විවේචනයට ලක් වීම කණගාටුවට කරුණක් බවයි ස්කොට්ලන්ත පොලිස් පුහුණු පාසලේ ජාත්‍යන්තර සංවර්ධන අංශයේ ක්‍රේග් ඩුවර් ප්‍රකාශ කළේ.

“ මේ ගැන මම කණගාටු වෙනවා. බ්‍රිතාන්‍ය රජය ආරක්ෂක පහසුකම් සැපයීමේ වැඩසටහන් දියත් කරන්නේ එම වැඩසටහන් මගින් මානව හිමිකම් වලට තර්ජන ඇති නොවන බව තහවුරු කර ගෙන, අපි ලංකාවේ දියත් කල පුහුණු වැඩසටහන ජාත්‍යන්තර සහ පොලිස් පුහුණු කිරීමේ ප්‍රමිති වලට අනුව සකස් කල එකක්. අපි ලබා දුන් පුහුණුවේ සමස්ත අරමුණ ලංකාවේ ප්‍රජා පොලිස් සේවා වර්ධනය කිරීම” බව ඔහු කියා සිටියා.

ස්කොට්ලන්ත පොලිස් විද්‍යාලය

ශ්‍රී ලංකාවේ පොලිසියට එල්ල කෙරෙන මානව හිමිකම් කඩ කිරීමේ චෝදනා සම්බන්ධයෙන් තම වැඩසටහනට ඇඟිල්ල දිගු කිරීම පිළිගත නොහැකි බව සඳහන් කළ පොලිස් පරීක්‍ෂක ක්‍රෙග් ඩුවර්, ස්කොට්ලන්ත පුහුණු කරුවන් සැකකරුවන්ගෙන් ප්‍රශ්න කරන අන්දම හෝ මහජන ආරක්ෂාව සම්බන්ධ කටයුතු කරන අන්දම පිළිබඳ පුහුණු වැඩසටහන් ලංකාවේ පොලිසියට ලබා නො දුන් බව ද ප්‍රකාශ කර සිටියි.

සමස්ත වැඩසටහන තුල මානව හිමිකම් ආරක්ෂා කල යුතු අන්දම අවධාරණය කළ බව කියා සිටි පොලිස් පරීක්ෂක ඩුවර්, කිසිදු අවස්ථාවක මානව හිමිකම් අමතක කර කටයුතු කළ හැකි බව සඳහන් නො කෙරුණු බවද ඔහු අවධාරණය කර සිටියි.

නමුත් මෑත කාලයේ ශ්‍රී ලංකාවේ සිදුවූ පොලිස් පහරදීම් සහ වෙඩි තැබීම් සම්බන්ධයෙන් විමසු විට ස්කොට්ලන්ත පොලිස් විද්‍යාලයේ පොලිස් පරීක්ෂක ක්‍රෙග් ඩුවර් පැවසුවේ එම සිදුවීම් දැන ගැනීමෙන් තමා ඉමහත් කණගාටුවට පත් වූ බවයි.