වතු සමිති නායක 'රතු කොඩි' රාමයියා සමුගනී

  • 19 මැයි 2013

දශක හයකට වැඩි කලක් ලාංකේය වාමාංශික ව්‍යාපාරයේ නියැලි වතු කම්කරු නායකයෙක් දිවියෙන් සමුගත්තේය.

ඕ ඒ රාමයියා නමින් ප්‍රකට ඔඩෙයාර් ආරුමුගම් රාමයියා හැත්තෑ හය හැවිරිදිව මියයන විට රතු කොඩි සමිතියේ නායකයායි.

රතු කොඩි සමිතියේ ප්‍රධාන ලේකම් ඕ ඒ රාමයියා එක්සත් සමාජවාදී පෙරමුණින් මුල්ම පළාත් සභා මැතිවරණයේ තරග වැදී ජයගත් මධ්‍යම පළාත් සභාවේ පළමු සභිකයන් අතුරින් අයෙක්.

ශ්‍රී ලංකා කොමියුනිස්ට් පක්ෂයේ දේශපාලන මණ්ඩල සභිකයකු ලෙසින් දේශපාලන නායකත්වයද දැරූ ඕ ඒ රාමයියා ජ්‍යෙෂ්ට අමාත්‍ය ඩිව් ගුණසේකර විසින් හඳුන්වනු ලැබුයේ ලංකා වාමාංශික ව්‍යාපාරයේ තුන්වැනි පරම්පරාවේ නායකයකු මෙන්ම දේශපාලන දැනුමින් පරිනත අයකු ලෙසින්.

දිවි හැර ගිය වතු සමිති නායකයා ගේ දේහය හැටන් පුරහලේ මහජන ගෞරවය පිණිස තබා අවසන් කටයුතු සඳුදා නාවලපිටියේදී පැවැත්වීමට නියමිත බව ඥාතීහු බීබීසීයට පැවසූහ.