ටෝනි රණසිංහ

සිනමාවේදී හා සාහිත්‍යවේදී ටෝනි රණසිංහ කියවන්නේ ඉංග්‍රීසි මහා කවි විලියම් ෂේක්ස්පියර්ගේ 'හැම්ලට්' ශෝකාන්තය.

රණසිංහ හෙට්ටිආරච්චිගේ ඉග්නේෂස් ඇන්තනි සිල්වා ලෙසින් මෝදරින් ලොව පිවිස, සිව් දශකයක් ඉක්ම ගිය යුගයක් සිංහල රිදී තිරය අරා සිටින ටෝනි රණසිංහයන් සිය රංගන දිවිය ඇරඹුවේ 1963 දී ධර්මසිරි වික්‍රමරත්නගේ 'රන් තෝඩු' වේදිකා නාට්‍යයෙන් කරලියට ගොඩ වෙමින්. සිය මුල්ම රංග කාර්යය සඳහා ටෝනි හොඳම නළුවා ලෙසින් අග්‍රාණ්ඩුකාර සම්මානය දිනා ගන්නට සමත් වී. ඔහුගේ සිනමා රංගාවතරණය ඒ වසරේම ලෙස්ටර් ජේම්ස් පීරිසුන් අතින් තිරයට නැගුනු මාර්ටින් වික්‍රමසිංහයන්ගේ 'ගම්පෙරළිය'. ඉන් දෑවුරුද්දක් ඇවෑමෙන් ටෝනි හොඳම සහාය නළුවා සඳහා වන සම්මානය දිනා ගත්තේ ගාමිණී ෆොන්සේකාගේ 'පරසතු මල්' චිත්‍රපටයේ රංගනයට. 1969, 1976, 1979 තුන් වසරේම හොඳම නළුවා වී සිරිලක දිනුවේ ටෝනි රණසිංහ. නවකතා, නාට්‍ය, තිරකතා රචක ටෝනි රණසිංහයන් සාහිත්‍යයට කළ අමිල සම්ප්‍රදානය වන්නේ ෂේක්ස්පියරුන් ගේ ලෝ පතළ නාට්‍ය කීපයක්ම සිංහලයට නැගීම.