Na peathraichean Hulme bho Àrd-Sgoil Gheàrrloch agus na duaisean aca.

Rinn sgioba Gheàrrloch - na peathraichean Anna is Ceitidh Alice Hulme - a' chùis air Emily NicFhionghuinn agus Caitlin Nic a' Ghobhainn à Acadamidh Allt a' Mhuillin sa chuairt dheireannaich.

Chaidh duais sàr neach-deasbaid na farpais gu Anna Hulme cuideachd.

Thuirt Ceannard Àrd-Sgoil Gheàrrloch, Iain Port, gun robh iad air an dòigh le soirbheachas nan nighean.

Comharra

Tha Mgr Port ag ràdh cuideachd gur e comharra a th'ann air an obair mhath a ga dèanamh ann an Roinn na Gàidhlig san sgoil.

'S ann air a' chuspair 'Tha thìde aig Alba ìomhaigh ùr a shireadh an àite seann eachdraidh, pìobaireachd agus tartain' a bha na sgiobaidhean a' deasbad sa chuairt dheireannaich.

Rinn Cathraiche Comataidh Stiùiridh Deasbad BT Alba, Calum Iain MacLeòid, moladh mòr air ìre an deasbaid.

"Sonraichte"

"Bha farpais againn a bha sònraichte.

"Tha mi a' smaoineachadh gu bheil a h-uile duine a bha an làthair, agus an fheadhainn a bha ag èisdeachd air Radio nan Gàidheal, gun aontaicheadh iad gur e sin an deasbad a b'fhèarr a bh'againn", thuirt e.

Thuirt Mgr MacLeòid gun robh na sgiobaidhean rim moladh an dà chuid son na sgilean deasbaid aca agus ìre an cuid Ghàidhlig.

Bha na sgiobaidhean air trèanadh fhaighinn le sgilean deasbaid am bliadhna.