BBC Home
Explore the BBC
Tha na duilleagan seo a-nise air an tasgadh agus cha t\u00e8id an \u00f9rachadh tuilleadh. Leugh mu phoileasaidh tasglainn a\u2019 BhBC.

ALBA NAIDHEACHDAN

---------------
---------------
---------------
BBC Vocab
OFF / DHETH
» Turn ON
Cuir AIR
» What is VOCAB? Dè th'ann a VOCAB?
Tuilleadh
bhon BhBC
---------------
Cànain
 
Ùraichte air: 17 An t-Samhain, 2011 - Air fhoillseachadh aig 11:50 BST
 
Post-d gu caraid   Dreach clò-bhualaidh
Naidheachdan 1100 17mh an t-Samhain 2011
 

Lagh na h-Alba

Thuirt britheamh àrd-chùirte gu bheil an dòigh anns a bheil Lagh na h-Alba ag iarraidh fianais bho dhithis mus bi dìteadh ann seann fhasanta agus gum bu chòir cur às dha gu tur. Tha am Morair Càrlabhaigh a' moladh 76 atharrachadh san lagh, agus esan ag ràdh gum fàgadh sin siostam ceartais na h-Alba nas fhollaisiche, nas sìmplidhe, agus a rèir Lagh Chòirichean a' Chinne Daonna.

Northern Rock

Ceannaichidh Virgin Money aig Richard Branson am banca Northern Rock air £747m. Chaidh Northern Rock a chur fo smachd na Stàite ann an 2008. Tha dùil gum bi am banca aig Virgin Money ro dheireadh na bliadhna, agus chaidh gealltainn nach caill duine an cosnadh. Ged a bhitheas call ann fon aonta, thuirt an Seansalair, Seòras Osborne, gur e am banca a reic an rud a b'fheàrr do luchd-pàighidh nan cìsean.

Bàs Aithghearr

Tha Poilis a' Chinn a Tuath a' rannsachadh bàs aithghearr aig taigh ann an Crothaidh, beagan deas air Inbhir Nis. Thug duine às an teaghlach aire nam poileas gu bàs an duine a bha 70, mu 02:30m an-diugh. Cha do dh'innis na poilis fhathast cò e, ach tha iad a' rannsachadh a bheil ceangal eadar am bàs agus tubaist-rathaid san aon sgìre. Tha iad airson cluinntinn bho dhuine sam bith aig a bheil fiosrachadh sam bith mun chùis, agus thèid aithisg gu Neach-casaid a' Chrùin.

Companaidh Bhradan na h-Alba

Dh'innis Companaidh Bhradan na h-Alba gun do mharbh an galar Ameobic Gill Disease, iasg a bh' aca ann an Loch an Ròg ann an Leòdhas. Chan innseadh iad co mheud iasg a chaill iad, ach thuirt iad gu bheil smachd aca air an t-suidheachadh. Chaill Bradan na h-Alba na mìltean bhradan ris an aon tinneas ann an Eilean Arainn aig deireadh na mìos a dh'fhalbh, ach tha a' chompanaidh ag ràdh nach eil ceangal eadar an dà thachartas.

SAC Bharraigh

Thuirt Dualchas Nàdair na h-Alba gum bitheadh iad deònach cur às dhan mholadh gum biodh an Tràigh Mhòr ann am Barraigh ann an sgìre mhara ghlèidhte. Thug Ball nan Eilean Siar ann am Pàrlamaid na h-Alba, Alasdair Allan, a' chùis leotha, agus esan ag ràdh gum biodh e dona dhan eaconamaidh nam biodh an Tràigh Mhòr ann an SAC.

Cidhe Sgonnsair

Tha Comhairle na Gàidhealtachd a' beachdachadh an-diugh air buidseat a ghluasad air adhart airson obair-leasachaidh a bhiodh a dhìth airson bàt-aiseig ùir aig cidhe Sgonnsair anns an Eilean Sgitheanach. Tha CMal, a' chompanaidh a tha os cionn bhàtaichean-aiseig Chaledonian Mhic a' Bhriuthainn, a' coimhead an-dràsta air dà bhàta ùr a thogail a bhiodh a' ruith air bataraidhean a bharrachd air a' chonnadh àbhaisteach, agus iad am beachd tè dhiubh a chur air an t-slighe eadar Sgonnsair agus Ratharsair.

Spòrs

Chaidh ceann-suidhe FIFA, Sepp Blatter, a chàineadh gu dubh airson a bhith ag ràdh nach eil gràin-cinnidh na thrioblaid air pàirce a' bhuill-choise. Agus tha àrd-oifigear Chomann Chluicheadairean Buill-choise Proifeasanta Shasainn, Gòrdan Mac an Tàilleir, am measg na tha ag ràdh gu bheil an t-àm aig Sepp Blatter a dhreuchd fhàgail.

Tha dragh as ùr ann mu sheasmhachd a' bhuill-choise an Alba, agus Banca Dail Chluaidh a' sguir den taic dhan SPL aig deireadh an ath-sheusain.

Agus thuirt an Coidse Rugbaidh Astràilianach, Eddy Jones, gu bheil ùidh aigesan ann a bhith na mhanaidsear air Sasainn, an dèidh do Mhàrtainn Johnson an dreuchd fhàgail.

 
 
CEANGALAICHEAN IONADAIL
Naidheachdan 1100 16mh an t-Samhain 2011
16 An t-Samhain, 2011 | Naidheachdan
Naidheachdan 1100 14mh an t-Samhain 2011
14 An t-Samhain, 2011 | Naidheachdan
Naidheachdan 1100 11mh an t-Samhain 2011
11 An t-Samhain, 2011 | Naidheachdan
Naidheachdan 1100 10mh an t-Samhain 2011
10 An t-Samhain, 2011 | Naidheachdan
AN TUILLEADH
 
 
Post-d gu caraid   Dreach clò-bhualaidh
 

About the BBC | Help | Terms of Use | Privacy & Cookies Policy