Tha an leasachadh a' tighinn an cois atharrachaidh air clàr-ama aiseig Eilein Chanaigh

Bidh seòlaidhean moch is anmoch Disathairne, agus aon sheòladh Là na Sàbaid.

Bho chionn dà bhliadhna, cha robh seirbheisean ann idir air an deireadh sheachdain tron Gheamhradh.

Tha an leasachadh a' tighinn an cois atharrachaidh air clàr-ama aiseig Eilein Chanaigh.

Chaidh an t-seirbheis sin atharrachadh gu bhith nas goireasaiche do mhuinntir Chanaigh, le seirbheis a-nis aca madainn na Sàbaid, an àite madainn Disathairne.

Tha gnìomhachasan ann an ceann a deas an Eilein Sgitheanaich am measg na tha an dùil buannachd fhaighinn, a thuilleadh air oileanaich aig Colaiste na Gàidhlig, Sabhal Mòr Ostaig.

"Bha luchd-turais ron a seo, nam biodh iad a' tighinn airson deireadh na seachdain, dh'fheumadh iad a bhith a' cur cuairt mhòir timcheall a' Chluainnidh 's Inbhir Garradh," thuirt Ruairidh Moireach, a tha na stiùiriche air Urras Coimhearsnachd Shlèite.

"Ann an droch shìde a' Gheamhraidh cha robh sin uabhasach freagarach, agus bha gu leòr dhaoine nach robh a' tighinn.

"Cuideachd 's urrainn dhan cholaiste a-nise gnothaichean a chur air dòigh airson deireadh na seachdain.

"Nì sin feum mòr dhan sgìre - 's i sgìre mhòr turasachd a tha seo, agus a h-uile càil a thachras a bhios a' brosnachadh agus a' toirt misneachd dha sin, 's e rud math a th' ann dhan sgìre.

"Tha an sgìre seo air a bhith a' tagradh ri Mac a' Bhriuthainn o chionn bhliadhaichean, airson 's gun deadh seirbheis an aiseig a leasachadh, agus tha sin air tachairt a-nis," thuirt e.