Chaidh obair a dhèanamh mar tha gus an eaglais a dhìon bhon mhuir.

Tha ceangal aig Eaglais na h-Aoidhe san Rubha ri cinnidhean 'ic Leòid, 'ic Neacail agus 'ic Coinnich.

Tha Urras Eaglais na h-Aoidhe air £324,000 fhaighinn son cosg air an obair.

'S ann à Alba Aosmhor, Comhairle nan Eilean Siar, LEADER Innse Gall, Urras Steòrnabhaigh agus Comhairle Coimhearsneachd an Rubha a thàinig taic.

Chaidh obair a dhèanamh mar tha gus an eaglais a dhìon bhon mhuir.

Thèid an t-airgead ùr seo a chosg air an togalach fhèin a dhèanamh seasgair.

"Tha iomadach bliadhna bhon a thòisich sinn ag iarraidh ath-leasachadh a thoirt air an togalach eachdraidheil seo", thuirt cathraiche Urras Eaglais na h-Aoidhe, Dòmhnall Crichton.

"Tha sinn a-niste san ann an suidheachadh fortanach gu bheil sinn a' faighinn airgid son dèanamh cinnteach gu bheil e air a dhìon is gu bheil e sàbhailte airson a bhith air a cleachadh leis a' choimhearsnachd anns na bliadhnaichean a tha air thòiseach", thuirt e.

San àm ri teachd tha an t-urras a' coimhead ri mullach a chur air an togalach agus obair a dhèanamh air a' chladh.

Thuirt Mgr Crichton gur dòcha gum b'urrainn do chloinn aig sgoil ur na sgìre a dhol an sas ann am pròiseact mun chladh.

Tha an t-urras dòchasach gum bi ùidh aig daoine bho air feadh an t-saoghail ann an eachdraidh na h-eaglaise agus mar sin gum bi i a' tarraing dhaoine dha na h-eileanan.

Bidh an t-urras cuideachd a' stèidheachadh buidheann air am bi Caraidean Eaglais na h-Aoidhe agus dùil aca cuideachd làrach-lion ùr mun eaglais a chur air dòigh.