Dh'iarradh air croitearan sna Hearadh eòrna fhàs son a bhrachadh

Tha Comhairle nan Eilan Siar a' beachdachadh air an iarrtas airson làrach air an Tairbeart.

Tha a' chompanaidh Isle of Harris Distillers son taigh-staile agus pàirc-chàraichean a thogail air làraich aig an Loch an Ear air an Tairbeart.

'S e a' chompanaidh Fraser Architecture à Càirinis an Uibhist a Tuath a dhèanadh an obair-togail.

Thathas am beachd mac-na-braiche a dhèanamh san taigh-staile, agus dh'fhaodadh gun rachadh suas ri 20 obraichean a chruthachadh.

Tha a' chompanaidh airson ceanglaichean a dhèanamh le croitearan na sgìre is gum fàsadh iadsan eòrna a bhiodh freagarrach son uisge beatha a dhèanamh.

Ma thèid cead-dealbhachaidh a thoirt seachad tha an luchd-leasachaidh airson is gun tòisich obair-togail ro dheiradh na bliadhna, is obair air an uisge-bheatha fhèin a chruthachadh gus tòiseachadh ann an 2015.