Tha na planaichean air tòrr chonnspaid adhbharachadh

Tha dhà dhe na sgoiltean sin - Sgoil an Naoimh Chiarain ann an Ceann Loch Chille Chiarain, agus Sgoil Àird Chonghail ann an Dail Mhàilidh, dùinte an-dràsta co-dhiù, leis nach eil sgoilearan sam bith annta.

'S iad na sgoiltean eile a tha air liosta na Comhairle: Bòd a Tuath, Tollard, Lus, Achadh na Leamhna, Àird Chatain, Mionaird, Rubha na h-Aoireann, An Clachan agus Sgibinis.

'S e Learg na h-Uinnsinn an aon sgoil a chaidh a thoirt far na liosta.

Iomairt

Bha planaichean aig a' Chomhairle an toiseach airson 25 sgoil a dhùnadh ach b' fheudar dhaibh sin a leigeil às.

Bha pàrantan a' togail fianais taobh a-muigh oifisean na Comhairle fad deich uairean de thìde Dimàirt fhad 's a bha comhairlichean a' deasbad nam molaidhean.

Thig comhairlichean gu co-dhùnadh cinnteach mu bhith a' dùnadh nan sgoiltean anns an Damhair le dùil gun dùineadh iad aig àm na Nollaige.

Mur a bi daoine riaraichte le co-dhùnadh na Comhairle aig an àm sin, bidh trì seachdainnean aca iarraidh air an Riaghaltas a dhol an sàs anns a' chùis - mar a thachair roimhe le cuid de sgoiltean nan Eilean Siar.