Thèid a' choinneamh a chumail ann an Grabhair

Thèid a' choinneamh a chumail ann an Sgoil na Pàirce ann an Grabhair.

Thug Riaghaltas na h-Alba cead seachad an oighreachd a cheannach an aghaidh toil an uachdarain, Barry Lomas, fo Achd Ath-Leasachaidh an Fhearainn (2003), Diluain.

'S e a' chiad uair a chaidh cead a thoirt seachad an aghaidh toil uachdarain.

Aig a' choinneimh, mìnichidh luch-stiùiridh an Urrais na h-ath-cheumanan a dh'ionnsaigh an oighreachd a cheannach.

Canaidh iad cuideachd gu bheil iad an dòchas còmhraidhean a chumail leis an uachdaran a-rithist feuch an oighreachd air fad a thoirt seachad gu saor-thoileach.

Aig an ìre seo, 's e fearann a' chùl-chinn a thèid a cheannach, ach tha an t-Urras ag amas air an oighreachd gu lèir a bhith ann an làmhan na coimhearsnachd aig a' cheann thall.

Mìnichidh a' bhuidheann cuideachd na roghainnean a tha romhpa a thaobh maoineachadh fhaighinn.

Thèid beachd na coimhearsnachd iarraidh a-rithist nuair a tha neach-measaidh neo-eisimeileach air luach na h-oighreachd a thomhas.

Dh'fheumadh a' choimhearsnachd an uair sin co-dhùnadh co-dhiù a bheil iad airson a dhol air adhart, agus bidh sia mìosan aca an t-airgead a thogail.