Thug a' Chomhairle cead dhan na planaichean ann an 2008

Thug Comhairle na Gàidhealtachd cead dhan na planaichean an uiridh, agus bha iad a' cur romhpa an dà sgoil ùr a thogail ro 2011.

Dh'aidich Cathraiche Chomataidh Ghàidhlig na Comhairle, an Comh. Hamish Friseal, gu bheil e a' coimhead gu math eu-coltach a-nis gum faigh iad air na pròiseactan a chrìochnachadh taobh a-staigh na h-ùine sin.

Bha cuid de phàrantan air dragh a nochdadh mu cho beag adhartais 's a chaidh a dhèanamh thuige seo ann a bhith a' toirt a' phròiseict gu buil.

Thuirt an Comh. Friseal gu robh obair a' leantainn a' sireadh làraich a dh'fhaodadh a bhith freagarrach airson nam bun-sgoiltean ùra.

Suidheachadh an ionmhais

Dh'aidich e cuideachd ge-tà gum faodadh dìth ionmhais, an dà chuid taobh a-staigh na Comhairle agus cuideachd aig ìre Riaghaltais, ceist a chur mun coinneamh.

Anns an t-saoghal a th' againn an-diugh, timcheall air airgead agus an stait anns a bheil an dùthaich air taobh airgid .. feumaidh sinn a bhith gu math faiceallach ciamar a chosgas sinn airgead anns a' bhliadhna a tha romhainn.   Comh. Hamish Friseal

Fhuair Comhairle na Gàidhealtachd £1.5m bhon Riaghaltas am bliadhna airson foghlam tro mheadhan na Gàidhlig a leudachadh, le gealltanas gum faigheadh iad an aon shuim a-rithist an ath-bhliadhna.