Tha an heileacoptair a' laighe ri taobh an ospadail ann am Barraigh

Tha iad ag ràdh gu bheil na heileacoptairean ro bheag agus a' toirt ro fhada an t-eilean a ruigsinn.

Choinnich BP nan Eilean Siar, Aonghas Brianan MacNèill, agus Uisdean Dùbhghlas bho Chomhairle Choimhearsnachd a' Bhàgh a Tuath, ri Seirbheis Charbad-eiridinn na h-Alba mun chùis.

Tha seirbheis an-dràsta aig an eilean às Glaschu agus Inbhir Nis.

An Tràigh Mhòr

"Tha sinn a' dèanamh a-mach gu bheil iad ro bheag," thuirt Mgr Dùbhghlas.

"Nam falbhadh pàiste, dh'fhaodadh nach fhaigheadh na pàrantan air falbh còmhla ris a' phàiste.

"Ma tha an t-sìde dona chan eil duine a' toirt dhaibh na sìde ceart aig an àm a fàg iad, air t-sàileabh 's gu bheil iad a' laighe a-niste aig an ospadal ann am Barraigh.

"Bha itealan roimhe ann, Islander, agus bha e a' cumail ris an t-seirbheis glè mhath.

"Bha sinn ag iarraidh rudeigin, caran an aon rud, a ghabhadh laighe air an tràigh againne am Barraigh, seach a bhith a' falbh ann an heileacoptair.

"A-rithist, tha heileacoptair nas daoire a ruith na bha an t-seann itealan," thuirt e.

Tha Seirbheis Charbad-eiridinn na h-Alba ag ràdh gun do sheall iad grunn thursan gu bheil piseach air a thighinn air seirbheis nan heileacoptairean-eiridinn ann am Barraigh.

Thuirt iad nach eil iad an urra ris an t-sìde-mhara le heileacoptair, mar a bhiodh iad le plèana a laigheadh air an tràigh.

Thuirt iad gun cùm na manaidsearan aca coinneamh phoblach ann am Barraigh 24mh den t-Samhainn, mun ath-ghinealach de charbadan-eiridinn adhair.