Iain MacAonghais Fear-naidheachd a' BhBC

	Tha strì air a bhith ann bho chionn 25 bliadhna san dùthaich

"Tha sinn a' guidhe do Dhia gun tachair seo. Tha sinn ag iarraidh sìth am measg dhaoine" – faclan màthar a chaill dithis mhac san strì eadar am PKK agus airm na Tuirc.

Dh’fhalbh Saim agus Deniz Turk 'dha na beanntan.’ Sin a dh’innis am màthair, Sebriya dhuinn. Ann an ceann-an-ear dheas na Tuirc , tha sin a’ ciallachadh gur robh iad nam buill den PhKK.

Tha am PKK ag ràdh gur iad buidheann de shòisealaich nàiseantach, ach a rèir Breatainn, Aimeireagaidh, an Aonaidh Eòrpaich agus NATO, ’s iad buidheann de cheannaircaich.

Abdullah Öcalan

Ach do phrìomhaire na Tuirc, Recep Tayyip Erdoğan, tha pian agus bron nam màthraichean a chaill an cuid-chloinne air cùlaibh na h-iomairt gus sìth fhaighinn.

"Nar leigeadh Dia, chan eil dòrainn nas truime na do mhac a chall. Chan eil sinn ag iarraidh gum biodh a leithid de mhulad aig duine sam bith. Cha sheas màthair sam bith ris a leithid de chràdh."

Tha an Riaghaltas aig Erdoğan a’ moladh ‘Iomairt Churdach’ – iomairt a bheireadh an tuilleadh chòraichean do Churdaich na dùthcha, gu h-àraidh ann am foghlam agus craoladh.

Ach do mhàthar eile, chan eil ise idir dòchasach mun gnothach.

Bhàisich mac Zeliha Çoban – Ibrahim – agus e mìos bho bhith a' crìochnachadh a sheirbheis ann an airm na Tuirc.

"Tha mi a' smaoineachadh gu bheil sìth do-dhèanta. O chionn 's gu bheil fear-brathaidh air ar beulaibh. Chan eil mi a' toirt duine air, no fiù 's beathach. Nan canainn beathach, ‘s ann a bhithinn a' cur sìos air a' bheathach. 'S e breugaire a th’ann."

Tha Zeliha a’ bruidhinn mu cheannard a' PhKK – Abdullah Öcalan.

Chaidh Öcalan a chur an grèim ann an 1999, agus bhon uair sin tha e air a bhith leis fhèin ann am prìosan air Eilean Imrali far chosta na Tuirc.

Ach ri linn na h-iomairt ùire, thèid e gu prìosan ùr far am bi e còmhla ri prìosanaich eile, rud a tha cur an fheirg air cuid san dùthaich.

	Tha am PKK ag iarraidh inbhe nas àirde don t-sluagh Churdach

Tha am PKK cuideachd ge-tà a’ cumail a-mach gu bheil iad a’ sireadh sìthe.

Bho chionn mìos, air òrdughan a’ cheannaird Öcalan, chaidh ochdnar de bhuill na buidhne thairis air crìch Ioraic. Chaidh an saoradh leis na h-ùghdarrasan an sin cha-mhòr sa bhad. Mar as trice bhiodh iad air a bhith air an cur an grèim. Chruinnich na mìltean airson fàilte a chur orra ’s mòran dhen bheachd gu bheil seo mar chomharra gu bheil sìth air fàire.

Ach am beachd phartaidhean nàiseantach na dùthcha, tha ceist mu dè cho fìor ’s a tha iomairt-sìthe na buidhne.

"Ma 's e amas a' PhKK armachd a chur seachad agus stad a chur air ceannarcas, bhiodhmaidne a' cur fàilte air a sin, agus mar adhartas ann a bhith a' cruthachadh sìthe agus bunailteachd anns a’ sgìre," dh’innis iar-cheannard Partaidh Phoblaich a' Phobaill dhuinn.

"Ach, tha na comharrachaidhean a’ sealltainn gu bheil rudeigin gu math eadar-dhealaichte a’ tachairt. Tha muinntir a' PhKK a thàinig tarsainn na crìche air tighinn mar thosgairean agus ag iarraidh chùmhnantan àraid. Chan urrainn dhuinn mar sin fàilte a chur air an tachartas seo."

Tha Riaghaltas na Tuirc a-nis a’ bruidhinn ri Armenia, as dèidh bhliadhnaichean gun chàirdeas – rud nach biodh mòran air sùileachadh. Tha iad cuideachd a’ beachdadh air an dòigh as fheàrr air sìth leis an cuid-nàbaidhean Cìopras agus le Syria.

A’ bheil Riaghaltas na Tuirc a’ feuchainn rin ìomhaigh atharrachadh, neo a' bheil na h-iomairtean seo, agus gu dearbh an iomairt Churdach mar phàirt dhen oidhirp aca faighinn a-steach don Aonadh Eòrpach?

"Chan eil sinn ga dhèanamh airson ceum a ghabhail a chum an AE," dh’innis aon de phrìomh luchd-poileataics a' phartaidh riaghlaidh, an Partaidh an AK dhuinn.

"Tha sinn ga dhèanamh airson gu bheil e riatanach agus gu bheil sinn a' creidsinn ann. Tha e do-dhèanta gun do thòisich sinn am pròiseas seo dìreach airson faighinn nas fhaisge air an AE."

Ge bith dè an adhbhar a th’ air cùlaibh nan gluasad gu ruige sìthe, chan eil dòchas agus misneachd am measg a' mhòr-shluaigh sa cheann an ear-dheas.

Ach leis an Riaghaltas ag ràdh nach bruidhinn iad idir ri Abdullah Öcalan, tha ceist mu dè cho faisg 's a dh’fhaodadh an t-sìth a bhith.

Tha smachd agus cumhachd aig Öcalan air reubaltaich agus luchd-taice a’ PhKK, agus am beachd cuid, as aonais bhriathran agus taic Öcalan, cha tig sìth.