Thèid bàta eile a chur na h-àite airson seirbheis na Sàbaid

Bha dùil ri MV Eilean Leòdhais ann an Steòrnabhagh aig 12:15f, ach cha do nochd i gu mu dhà uair as dèidh làimhe.

Chaidh dà sheòladh às an eilean a chur dheth air sgàth nan trioblaidean agus tha luchd-einnsiniaraidh air a bhith ag obair air a' bhàta fad an fheasgair.

'S e seo fear de na làithean as trainge dha Caledonian Mac a' Bhriuthainn le mòran a' tadhal air Leòdhas airson Fèis Cheilteach Innse Gall.

MV Eilean Arainn

'S e MV Eilean Leòdhais a bha a' chompanaidh a' dol a chleachdadh son a' chiad aiseig Shàbaid eadar Steòrnabhagh agus Ulapul air an deireadh sheachdain seo.

Tha suas ri 100 carbad a' feitheamh ann an Ulapul gus faighinn a-nall a Steòrnabhagh.

Thathas a' tuigsinn gum falbh MV Innse Gall Ulapul mu mheadhan oidhche gu Steòrnabhagh.

Thuirt fear-labhairt Chal Mac nach eil coltas ann gun gabh gnothaichean a chur ceart ro Là na Sàbaid, 's gun toir e 40 uair a thìde a càradh.

Thuirt e nach robh ceist ann an seòladh seirbheis Shàbaid air an deireadh sheachdain seo eadar Steòrnabhagh is Ulapul.

Thuirt e ge-tà, nach robh cinnt ann a thaobh clàr-ama na seirbheis air an t-Sàbaid.

Bhathas an dòchas falbh à Steòrnabhagh aig 2:30f.

'S e MV Eilean Arainn a dheadh na h-àite, ach bheir e 14 uairean a thìde a thoirt a Steòrnabhagh às Ìle.

Thathas ag iarraidh air daoine shiubhal gu agus bho Leòdhas taobh na Hearadh.

Thuirt an t-Urr Aonghas Mac a' Ghobhain a tha air a bhith ag iomairt son bliadhnaichean an aghaidh aiseagan air an t-Sàbaid nach robh Cal Mac a' tuigsinn gun robh an Tighearna a' bruidhinn riutha.

"Mur eil cridhe aca, no cluais son eisdeachd, tha cheart cho ma dhaibh a bhith nam pàganaich.

"Tha Cal Mac a' sabaid an aghaidh a' Chruthaidheir 's chan e na h-eileanaich a tha seo," thuirt e.