Thèid an sgeama a dhèanamh nas sìmplidh a-nis

A-nis chan fheum uidheamachd airson na tagaichean a leughadh a bhith aig na tuathanaich fhèin idir, ged a dh'fheumas e a bhith aig na margaidhean sprèidhe is na taighean-spadaidh.

Tha sin a' ciallachadh nach fheum croitearan agus tuathanaich pàigheadh airson na h-uidheamachd iad fhèin.

'S ann airson sùil a chumail air mar a tha caoraich gan gluasad bho chroit gu croit, is an uair sin gu margaidh is gu taigh-spadaidh, a tha an sgeama a chaidh a chur an sàs gu connspaideach leis an Aonadh Eòrpach.

Is e Dòmhnall Dòmhnallach fear de stiùirichean Bhunait na Croitearachd is tha esan den bheachd nach e naidheachd ùr a tha seo idir, gun robh taic ga toirt seachad mar thà do chroitearan a bha feumach air cuideachadh airson an uidheamachd a cheannach.

Chan eil mi a' smaoineachadh gu bheil sinn càil nas fhaide air adhart   Dòmhnall Dòmhnallach, Bunait na Croitearachd

Tha Mgr Dòmhnallach toilichte ge-tà, gu bheil ùghdarras an Riaghaltais aig an naidheachd nach leig croitearan a leas uidheamachd a cheannach iad fhèin idir a-nis, ach gur i buannachd gu math lag a tha ann.

"Tha gu leòr ann a bhios a' smaointinn gur e adhartas a tha seo, ach chan eil mi a' smaoineachadh gu bheil sinn càil nas fhaide air adhart.

"Feumaidh tu na tagaichean a chur ann ge b' oil leat," thuirt e.

Tha cuid de chroitearan is tuathanaich fhathast mì-thoilichte gu bheil aca ri tagaichean a chur air an cuid caorach idir, is Mgr Dòmhnallach fhèin den bheachd gum bu chòir cur às dha uile gu lèir.

"Ma tha an cumhachd is an t-ùghdarras aig an Roinn Eòrpa leithid de lagh a thoirt a-steach, tha fios fo shealbh gu bheil an aon chumhachd aca an riaghailt sin a chur a-mach a bith," thuirt e.