Stèidhichear seirbheis Sàbaid eadar Steòrnabhagh 's Tìr Mòr

Choinnich ceannardan na companaidh aiseig, Caledonian Mac a' Bhriuthain, ri riochdairean Comhairle nan Eilean Siar airson bruidhinn mun chuspair chonnspaideach.

B' e seasamh oifigeil na Comhairle nach robh iad airson seirbheis Shàbaid a bhith ann.

Thuirt iad gun robh iad air an tàmailteachadh leis a' cho-dhùnadh ach nach b' e iongnadh a bh' ann.

Tha iad am beachd iarraidh air Riaghaltas na h-Alba, leis a bheil a' chompanaidh aiseig, gnothach a ghabhail ris a' chùis.

Sa Chèitean thuirt Cal Mac gun robh iad a' sireadh bheachdan air ceist sheirbheisean Sàbaid.

Bha iad a' cumail a-mach gun d' fhuair iad comhairle laghail gun robh iad a' dol an aghaidh chòirichean a' chinne-daonna leis nach robh iad a' toirt seachad seirbheis air an t-Sàbaid.

Tha a' Chomhairle ag ràdh ge-tà nach deach beachdan dhaoine a thrusadh gu dòigheil.

Tha iad cuideachd ag ràdh gun robh còir aig a' chompanaidh aiseig a' chomhairle laghail a fhuair iad foillseachadh.