Bha Craig Moireasdan a' cleachdadh quad le caraid

Bha Craig Moireasdan, a bha 20 bliadhna de dh'aois agus a bhuinneadh don Bhac, a' cleachdadh a' qhuad le caraid.

Chaidh e le creig ann an Gleann Tolastaidh ann an ear-thuath an eilein.

Bha caraid, a bha 19 bliadhna de dh'aois, a-muigh còmhla ris aig an àm, agus chuir esan fios air na buidhnean teasairginn mu 11:00f.

Chaidh sgiobaidhean mhaor-cladaich à Steòrnabhagh, Nis agus Bràgar a ghairm, a thuilleadh air na poilis, an luchd-smàlaidh 's an t-seirbheis eiridinn.

Chleachd caraid an duine solas camara a' fòn-làimhe aige gus aire a tharraing gu far an robh iad.

Bha Mgr Moireasdan air tuiteam eadar 30 - 80 troigh.

Thug heileacoptair Mhaor-cladaich Steòrnabhaigh an duine gu Ospadal nan Eilean, ach bha e marbh mun àm a ràinig iad.

Tha Poilis a' Chinn a Tuath a' rannsachadh na cùise, ach thuirt iad nach eil iad amharasach mu na thachair.

Thuirt a theaghlach: "Tha sinn ga iondrainn mhòr, 's thèid a chuimhneachadh nar cridheachan gu bràth.

"Thathas an dòchas, tro bhàs Chraig, gum bi daoine eile nas mothachaile air cho cunnartach 's a dh'fhaodas baidhseagail quad a bhith."