Dh'fhàg còignear stiùirichean agus àrd-oifigear am bliadhna

'S e Jim Barr Stiùiriche ùr an Ionmhais le Graeme Mac a' Mhaolain ag gabhail obair Stiùiriche Òigridh.

Thuirt ceann-suidhe a' Chomainn, Donnchadh Camshron, gun robh eòlas farsaing aig an dithis agus gun robh e misneachail gun cuireadh iad gu mòr ri obair a' bhùird.

Bidh an Comann an dòchas gum bi cùisean nas rèidhe taobh a-staigh a' bhùird an dèidh mhìosan de dh'ùpraid nuair a dh'fhàg grunn stiùirichean.

Eòlas Farsaing

Tha Mgr Barr na chathraiche air Cluba Iomain Ghlinn Urchadain.

Chluich e dhan chluba agus do sgioba Oilthigh Obar Dheathain.

Bha Mgr Barr cuideachd na chathraiche air Urras Coille Obar Itheachain agus tha e air a bhith ag obair ann an gnìomhachas na h-ola.

Thar nan 28 bliadhna mu dheireadh tha Mgr Mac a' Mhaoilein air a bhith an sàs ann an ioman aig ìre òigridh, anns a' Ghearasdan, Inbhir Lòchaidh, Fìobha agus Inbhir Nis.

Trioblaidean a' Bhùird

As t-earrach am bliadhna, cha robh coltas ro mhath air cùisean aig a' bhòrd.

Aig aon àm cha robh ach triùir stiùirichean ann an dèidh do chòignear fhàgail.

A thuilleadh air sin dh'fhàg an t-àrd-oifigear, Gill Dhòmhnallach.

Thuirt ise gun robh i a' fàgail 's i airson rudan eile a dhèanamh.

Ach bha feadhainn a' coireachadh dhòighean stiùiridh a' bhùird.

Chuir cuid as leth a' chinn-suidhe, Donnchadh Camshron, gun robh e a' ruith a' Chomainn mar dhictàtor.

Chaidh Mgr Camshron às àicheadh sin gu tur, ag ràdh gun robh co-dhùnaidhean gan dèanamh le mòr-chuid a' bhùird.