Tha buill bhon Chomhairle, HIE, Stòras Uibhist agus an Riaghaltas air a' bhuidhinn

Dh'iarr a' bhuidhean-gniomh a chaidh a stèidheachadh a dh'aona ghnothaich an aghaidh gearradh cosnaidh aig ionadan QinetiQ ann an Uibhist, air an MoD barrachd ùine a thoirt dhaibh son beachdachadh air a' chùis.

Tha a' bhuidhean dòchasach gun tèid aca air na h-obraichean air fad a ghlèidheadh, 's iad dol a thoirt sùil gheur air cosgaisean QinetiQ agus gu h-àraid air mar a tha an MoD ag ràdh gum b'urrain dhaibh airgead a chùmhnadh.

Ann an litir gu ball nàiseantach nan Eilean, Alasdair Allan, thuirt Ministear an Dion, Quentin Davies gun robh e deònach am pròiseas a leudachadh, ach gum bu chòir smaointinn air dòighean eile a-mach às an t-suidheachadh seo a bharrachd air a bhith a' glèidheadh na cosnaidhean-sa mar a tha iad.

Rinn Mgr Davies soilleir san litir, gur e co-dhunadh duilich a bha seo dhaibh, ach gun robh na sàbhalaidhean cudhtromach aig an àm-sa.

Thuirt Mghr Allan gu robh iomairt mhòr air thoiseach air a' choimhearsnachd, ach gur e toiseach tòiseachaidh a bh'ann, barrachd ùine fhaighinn son beachdachadh air an t-slighe air adhart agus argamaidean nas làidire a chur mu choinneamh an MoD son na cosnaidhean a dhion.

Tha buill bho Chomhairle nan Eilean Siar, HIE, Stòras Uibhist agus buill-pàrlamaid à Holyrood agus Lunnainn air a' bhuidhean-gniomh.