Tha eagal gun tèid còrr is 120 cosnadh a chall

Tha a' chompanaidh dìon QinetiQ a' ruith an raoin as leth Ministearalachd an Dion (MOD), ach tha fathannan sa choimhearsnachd gu bheil dùil aig QinetiQ an obair aca a lùghdachadh ann an Uibhist no a dhùnadh buileach.

Thig fios feasgar bhon MOD dè dìreach a thachras, is iad air coinneamh-naidheachd a chur aig dòigh airson innse na tha fainear dhaibh.

Tha sinn an dòchas nach bi e cho dona 's a thathas a' creidsinn   Sandy Cuimeanach, HIE

Dòchas

A-rèir aithris, dh'fhaodadh suas ri sia fichead cosnadh aig na raointean ann an Uibhist a' Deas, Beinn nam Fadhla agus Hiort a bhi ann an cunnart.

Tha beachd ann ge ta, gu faodadh a dhà uidhear sin an obraichean a chall leis gu bheil mòran chosnaidhean taobh a-muigh na raointean fhèin, an-crochadh orra.

Ge ta, thuirt Ceannard HIE Sandy Cuimeanach nach deach innse dhaibh-san mu na tha a' tachairt idir, agus gun àbhaist dhan Riaghaltas a h-uile buidheann a tharraing a-steach airson slìghe air adhart a dheasachadh ma tha dùil ri droch naidheachd ach nach do thachair sin an turas seo.

Thuirt e cuideachd ge-tà, nam biodh dùil ri deagh naidheachd gum biodh barrachd air briseadh anns na meadhanan mu na thachras.

"Tha sinn an dòchas nach bi e cho dona 's a thathas a' creidsinn, ach chanainn gur e dealbhachadh am prìomh ghnothach againn," thuirt Mgr Cuimeanach.

"Feumaidh sinn sgioba a chur air dòigh a dh'aithneachas na ghabhas dèanamh, dè na cosgaisean a bhios na luib, agus airson tuigsinn na tha a dhìth a thaobh ghoireasan gus cùisean a dhèanamh seasmhach," thuirt e.