Tha 250 duine ag obair sna raointean-rocaid uile gu lèir

Thig fios Diciadain bho Mhinistearalachd an Dìon (MOD) co-dhiù an tèid an t-ionad, a tha QinetiQ a' ruith às an leth, a dhùnadh no a lùghdachadh gus nach tèid.

'S iad QinetiQ a tha os cionn raon nan rocaidean ann an Uibhist, agus tha 250 dreuchd a' crochadh air an ionad.

Tha fathannan ann gun tèid innse gun caillear suas ri 120 dreuchd, agus a' chompanaidh airson an obair a ghluasad gu ionad ann an Aberporth, an ceann a deas na Cuimrigh, far a bheil iad mar thà air £12m a chosg.

Thuirt Cathraiche Comhairle Choimhearsnachd Loch Baghasdail, Raghnall MacFhionnghain, gum feumar cur gu làidir an aghaidh gluasaid sam bith an t-àite a dhùnadh.

"Seo an t-àm daoine a dhùsgadh suas," thuirt e.

"Tha a' Chomhairle 's an Stòras, agus a h-uile duine a th' ann a' dèanamh an rud cheart an-dràsta.

"Ann an eileanan mar seo nuair a dh'fhalbhas uiread siud de dhaoine à aon obair tha e a' dol a dhèanamh diofair mhòir dha na h-eileanan a tha seo," thuirt e.

Tha Mgr MacFhionnghain ag ràdh nach eil e soilleir idir dè a tha fa-near do QinetiQ.

"Chan eil mise a' tuigsinn dè mar a dheargas iad togalach mar siud a dhùnadh.

"'S e an rud as fheàrr a th' aca ann am Breatainn, dh'fhaoidte san Roinn Eòrpa, an rud a th' againn ann an Gèirinis," thuirt e.