Chaill a' bhuidheann an ticeadan nuair a chaidh Zoom fodha

Bha iad air ticeadan a cheannach airson a dhol gu Fèis Cheltic Colours ann an Ceap Breatainn, ach chaill iad iad nuair a chaidh a' chompanaidh adhair Zoom fodha.

Bha Zoom cuideachd air taic-airgid a thoirt dhan chòmhlan.

Chaill iad £3,000 nuair a thachair sin, agus bha dùil nach fhaigheadh iad air airgead a thrusadh airson ticeadan ùra a cheannach, ach fhuair.

Iasad

Leis gur i companaidh adhair shaor a bh' ann an Zoom, chaidh cosgaisean an turais suas gu mòr, 's bha aca ri £6,000 a thogail ann am beagan is sia seachdainnean.

Gu ruige seo cha deach aca air a h-uile sgilinn a dh'fheumas iad a thogail.

Thèid an t-airgead a chaill iad le Zoom a thilleadh thuca a dh'aithghearr, ach anns an eadar-ama dh'aontaich Comhairle Coimhearsnachd Uibhist a Tuath iasad £4,000 a thoirt dhaibh.

Fàgaidh sin gum feum iad cumail orra a' cruinneachadh airgid nuair a thilleas iad à Canada, airson am pàigheadh air ais.

Airson tuilleadh airgid a thogail, thèid cuirm chiùil a chumail ann am Beinn na Bhaodhla Oidhche Haoine, le Fred Moireasdan, Kathleen NicAonghais agus Iain Dòmhnallach a' nochdadh.