03 An t-Iuchar, 2008 - Air fhoillseachadh aig 12:40 BST

An ath cheum do "Faclair na Gàidhlig"

Thèid planaichean gnìomhachais an cur an clò airson Faclair na Gàidhlig.

Thathas ag amas air faclair eachdraidheil Gàidhlig a chruthachadh a tha aig an aon ìre 's a tha faclairean a tha ri fhaotainn ann am Beurla, leithid an Oxford English Dictionary, agus an Scottish National Dictionary.

Innte, thathas an dòchas cunntas a thuirt seachad air eachdraidh agus cultar na Gàidhlig agus nan Gàidheal, suas chun an là an-diugh a tha a' ceangal a-steach do Phlana Nàiseanta na Gàidhlig.

An sàs sa phròiseact, tha ceithir oilthighean - Glaschu, Obar Deathainn, Dùn Èideann agus Strath Chluaidh, a bharrachd air colaiste Gàidhlig na h-Alba, Sabhal Mòr Ostaig.

Tha dòchas gun tèid am pròiseact fhoillseachadh air an eadar-lìon cuideachd.

"Fìor Cudromach"

Mhìnich fear-gairm na buidhne stiùiridh, Boyd Robasdan, gu bheil na planaichean seo mar phàirt den treas ìre uallachaidh den phròiseact.

"'S e pròiseact mòr mòr a tha seo a sheasas mòran bhliadhnaichean agus 's e plana a tha seo airson 10 bliadhna."

An cois na planaichean a thèid fhoillseachadh Diardaoin aig Sabhal Mòr Ostaig le Ministear a' Chultair, Linda Fabiani, tha teachdaireachd ann gu feumar barantas gum bi airgead gu leòr ann.

Gu h-iomalan thar na 10 bliadhna, tha dùil gu feumar mu £4m airson a' phròiseact a thoirt gu buill.

"Ged bu shaoileadh cuid gur e suim mòr a tha sin," thuirt Mgr Robasdan a tha cuideachd a' leughadh Gàidhlig aig Oilthigh Strath Chluaidh.

"Chan eil e ach beag an taca ri na tha dùthchannan eile a' cosg air faclairean eachdraidheil den t-seòrsa seo."

Taic an Raighaltais

"Tha dùtchannan agus Rìoghachdan eile ga fhaicinn mar rud fìor chudromach, pròiseactan mar seo a bhith aca, agus tha sinn fhèin ann an Alba - a chànan Albais, tha a leithid seo aca mar thà agus tha an làn àm ann gum biodh faclair eachdraidheil ann airson na Gàidhlig cuideachd."

Tha an Riaghaltas air a bhith a' cur an taic ris a' phròiseact - thugar maoin seachad airson a bhith ag uallachadh air a son mar thà, agus tha a' bhuidheann dòchasach gum faighear an taic a tha a dhìth.

"Tha am Prìomh Mhinistear fhèin air ùidh a nochdadh anns a' phròiseact nuair a dh'fhosgail e ionad Fàs aig Sabhal Mòr Ostaig, bho chionn goirid, agus tha sinn cuideachd air airgead a chruinneachadh bho Bhòrd na Gàidhlig thar nam bliadhnaichean" thuirt Mgr Robasdan.

Mhìnich e cuideachd gu bheilear air a bhith a' faighinn taic mhaoin bho Urrasan leithid Urras Charnegie, agus Leverhume.

An dràsta, tha dithis ag obair air a phròisect, agus an dùil gun tèid barrachd luchd-obrach fhastadh thar nam bliadhnaichean.