Chan eil iad air uimhir de bhradain a ghiollachd 's bha iad an dùil

Choisinn Lighthouse Caledonia còrr is £13m sa chiad chairteal - suas còrr is £1.5m air na rinn iad an àm seo an-uiridh, ach cha do rinn a' bhuidheann cho math 's a bha iad dùil.

Thuirt iad nach eil iad air na h-uimhir de bhradain a ghiollachd 's a bha iad an dùil am bliadhna ri linn droch aimsir agus duiligheadasan air a bhith aca le miolan mara ann an Loch an Ròg ann an Leòdhas.

Prìsean

A bharrachd air sin, tha a' chompanaidh ag ràdh gu bheil prìs a' bhradain air a bhith na b'ìsle agus chan eil an t-iasg air a bhith a' fàs cho math air feadh Alba.

Bha sin a' fàgail nach robh e deiseal airson a' mhargaidh tràth gu leòr agus chan iad an aon chompanaidh a tha air a bhith a' gearran mun an seo.

Cuideachd bha cosgaisean aca an lùib a bhith ag atharrachadh a' chompanaidh bho bhun gu bàrr agus iad air a bhith a' toirt trì chompanaidhean còmhla mar aon.

Ach a dh'aindeoin 's gu bheil iad air 70 dhen luchd-obrach aca a phàigheadh dheth, tha iad fhathast ag ràdh gu bheil cùisean a' coimhead gealltanach dhaibh.

Tha iad an-dràsta ag obair gus cuidhteas fhaighinn de na miolan ann an Loch an Ròg agus cuideachd tha iad a' coimhead ri margaidh a' bhradain agus a' bruidhinn ri luchd-ceannach mu iarrtas, agus tha a h-uile dùil aca 30,000 tunna de bhradain àrach an ceann dà bhliadhna.