Dros y ddwy flynedd ar bymtheg diwethaf, mae Sesiwn Fawr wedi rhoi llwyfan i nifer o fandiau Cymru, gan gynnwys y Super Furry Animals, Frizbee, Cerys Matthews, Genod Droog, GLC a Derwyddon Dr Gonzo i enwi ond rhai, yn ogystal a gwahodd nifer o fandiau rhyngwladol i berfformio yn Nolgellau.

Trist iawn oedd clywed, na fydd Sesiwn Fawr eleni.

Fel nifer o ddigwyddiadau cerddorol, problemau ariannol sy'n bennaf gyfrifol. Yn ôl trefnwyr Sesiwn Fawr, roedd gan yr Ŵyl ddyled o dros £50.000.
Dywedodd un o gyfarwyddwyr yr Ŵyl Ywain Myfyr, nad oedd ganddynt ddewis:

"Y sefyllfa ydi fod ganddom ni ddyled - mae ganddom ni gredydwyr - a'r teimlad felly ydi y gallai cynnal gŵyl yn 2009 gael ei weld fel masnachu anghyfreithlon."

Mae' trefnwyr yn awyddus iawn i sicrhau y bydd digwyddiad cerddorol yn digwydd yn haf 2010 yn Nolgellau, ac wedi trefnu cyfarfod cyhoeddus yn Nhŷ Siamas am 7.30pm nos Fawrth 10fed o Fawrth , er mwyn lawnsio cronfa i godi arian i'r Sesiwn Fawr.
Meddai Ywain Myfyr:

"Ry'n ni'n gobeithio y byddwn ni'n ôl yn 2010 hefo Sesiwn Fawr, ond yn sicr mi fydd yn wahanol."