Ar nos Iau, Mawrth 6, daeth Rhys ar raglen Dafydd Du ar C2 i ddarllen ei gerdd newydd. Yn ôl Rhys, fe ysgrifennodd y gerdd ar ôl hedfan yn ystod yr wythnos, am y tro cyntaf, o Gaerdydd i Ynys Môn "wedi blynyddoedd o syrffed yr A470!" O'r Barri i'r Fali'n Sir Fôn Am fod yr hen lôn honno yn gyrru gŵr wir o'i go, a rheidrwydd troi'r car adre ar daith hir o dir y de'n ddigon i wangalonni'r mwyaf llon ohonon ni... Heddiw, mi gefais ryddid, a gweld gwyrth ein gwlad i gyd drwy len awyren a oedd yn addysg uwch mynyddoedd. Gweld pob cwm a gweld pob cae fyny o'r uchelfannau, a darnau o'r hen deyrnas draw i Lŷn drwy'r awyr las. Ymylon y cymylau a heulwen uwchben y bae, ac yn y man, gwenai Môn ar wely o orwelion. Tua'r llawr, at dir y llain, ehedwyd ar ddwy adain drwy'r aer, a thystiai'r oriawr, hyn i gyd mewn llai nag awr! Am fod yr hen lôn honno yn gyrru gŵr wir o'i go, heddiw mi gefais ryddid a gweld gwyrth ein gwlad i gyd. Lle bu laru ar y lôn, y tir uwch yw'r entrychion! Rhys Iorwerth