Ar nos Iau, Mai 8fed, daeth Mathew ar raglen Dafydd Du ar C2 i ddarllen ei gerdd newydd.

Machlud

Dyma fi
Yn hedfan dros Wlad yr Iâ
Yng nghanol mis Gorffennaf
A hithau'n hanner nos,
Mae'r haul yn gwenu arnaf

Syllaf drwy'r ffenest
At y tirwedd enwog ddisymwth.
Tirwedd emosiynol i'r enwog Bjork
Eisteddaf yma'n gegrwth

Ac yna, rwy'n meddwl i'm hun,
Dyma sefyllfa ddelfrydol i fyfyrio neu gyfansoddi
Gallaf ysgrifennu cerdd am yr hyn rwy'n ei weld
Am y llosgfynyddoedd oddi tanom.

Neu beth am rigwm neu naw am y rhewlif gerllaw
Am ei ogoniant, ei fawredd ei oerni pell

A chymharu'r hyn oll gyda hen Gymru fach
Neu beth am lymder hen berthynas?
Neu am hen ffrind coll, efallai?
Neu beth am atgof arbennig o'm plentyndod hyd yn oed?

Trosiad fan hyn, cymhariaeth fan draw
Cyflythreniad neu ddau efallai
(I gadw'r athrawon Cymraeg yn hapus, wrth gwrs)

Ond y peth yw
Ond y gwirionedd yw
Y gwir amdani yw

Bod yna rai profiadau nad oes modd eu rhannu mewn geiriau.

Diolch byth nad yw'r haul yn machlud yma -
Un peth yn llai i ysgrifennu amdano.

Mathew Hywel Rees (08.05.08)