Dyma gyfle i ddarllen cerdd newydd Bardd yr Wythnos ar C2 ar gyfer 17-21 Rhagfyr 2007, sef Llyr Gwyn Lewis.
Ar nos Iau, Rhagfyr 20, daeth Llyr ar raglen Dafydd Du ar C2 i ddarllen ei gerdd newydd.
Dad-strwythuro'r Dolig
Ddaeth hi i hyn
Bellach?
Ddaeth hi at gecru,
Cwestiynu, croesholi
Ac anghofio'r moli?
Ond mae honno'n hen stori.
Mor hen i ni bellach â'r hen stori ei hun
Yw holi a oes lle i'r Iesu'n y llun.
Ond bellach, rhaid gofyn oedd y Forwyn Fair
Wir yn Forwyn, ac a oedd un o'r doethion yn ddu?
Oedd gan y bugeiliaid glefyd y gwair?
Does na'm sôn am hynny'n y Gair.
Does na'm llawer o sŵn dathlu
I chwilio am Iesu'n ei fysg
A'r gwŷr doeth, llawn dysg
Wedi gadael eu desgiau a'u hysgol o'u hôl -
A'r plant heb eu pasiant -
I ddadansoddi, i ôl-fodernu,
I ddad-strwythuro'r preseb
Styllen wrth styllen.
Fe aeth hi'r tu hwnt i chwilio am yr Iesu
Rhwng y twrci, a'r siopa, a'r trimings a'r cwîn -
Pa les chwilio craidd mewn afal crin?
* * *
Un tro, anghofiais am y Forwyn Fair,
Ymatal rhag ceisio'r gwir yn y gwair
Rhoi'r gorau, hyd yn oed, i glustfeinio am y Gair
A chlywais, yn y gwellt,
Fy nghalon yn dawel yn gorfoleddu.
Llyr Gwyn Lewis, Rhagfyr 2007
Gwrando
Podlediad
Lawrlwytha Pod C2 am ddim - darnau gorau C2 pob wythnos ar gyfer dy chwaraeydd MP3. Beth yw podlediad?
C2 ar BBC iPlayer
Cyfle arall i glywed holl raglenni C2 o'r saith diwrnod diwethaf.
